U montri rangbah ka jylla, u Conrad K. Sangma ynne da wai u ya ka kaam ri sniang wa heh dooh hapoh India neibynta ka jylla namo ka Piggery Project in India for Meghalaya kawa T. 200 Klur hei emlang u Union Minister of State (MoS) for Agriculture and Farmers Welfare, u Kailash Choudhury wa u symbood montri rangbah, u Prestone Tynsong ha National Cooperative Development Corporation (NCDC), New Delhi.
Neiliang u Conrad da ekhublei u ya ka sorkar pyrdi wa ka NCDC wa da krehlang ko wa ka Meghalaya wow pynkrehkaam ya ka ‘Meghalaya State Piggery Mission’ ka wow pyndap yei emkaam sniang hapoh ka jylla.
Kani ka poisa kawa T.200 klur daw yarap ko ya ki 20,000 tylli ki thaw ri sniang ha i kreh wa slem hapyrdi ka NCDC wa ka sorkar jylla.
U Conrad da ong u wa ka Meghalaya State Piggery Mission kawa da kyrchaan da ka NCDC, daw yarap ko ya ka jylla wow pyndap yei emkaam sniang ko wei wow pynduna i emkaam wow thied na baar ya ki iwa kynjoh hadooh T. 150 klur chi snem wei daw yarap ko leh hei yoh i la ki 25,000 tylli ki manyung.
Da pyntip u leh wa lyngba kani ka Mission daw ye u e ram ya kiwa ri sniang khlem kawon kawon ka sut heiwa ka jylla wow su ya ka khnang wow pynchlur ya ki wow chim ram.
Heijooh i por da pyntip u wa dei krehlang wa ka MGNREGA, daw ye u yoh myntoi bha ki chnong na kani.
Da ong u leh wa ka sorkar da sdang ko ya ka “RESTART MEGHALAYA MISSION’, wa kynthup ya i krehlang yong ki warep, kiwa seiñ khih wa kiwi kiwi deiwa yarap ya ki ha iwa boon i liang deiwa pynrap leh wa ka jylla em ko ki thaw kiwa em jarjiar i man i long i suiñbneiñ iwa ye bha wow pynmih ya ki mar rep kam u chyrmit Lakadong, umngap, sakhontara, tit wa kiwi kiwi.
Da pynkynmoo u leh wa hapoh ka jylla da sdang ya kiwa boon ki rukom krehkaam kam ka Lakadong Mission, Jackfruit Mission, Mushroom Mission, Milk Mission wa ka Aquaculture Mission.
