U Elder Line, uwa man u National Helpline neibynta kiwa da tymmen da wai ya oo ynne ka sngi da u Kyrmen Shylla, Social Welfare Minister ha ka yalang wa pynman ha Conference Hall ka Directorate of Social Welfare, Shillong.
Deiwa Phone ha u Toll Free Number-14567, kiwa da tymmen wa em ha kylleiñ ka jylla daw ye ki wow yoh yutip chaphang i sumaar sukhær, ki mar ki mata neibynta ki tymmen, chaphang ki thaw sah ki tymmen namo ki Old Age wa Shelter Home. Lyngba uni u Helpline daw yoh leh yei yarap heiyatoh wa i eh waka kaam Pension, ka aiñ Maintenance Act wa kiwi de wa yatoh waka aiñ.
Kani ka Helpline da sdang wei da yarap poisa da ka Ministry of Social Justice and Empowerment ka sorkar India, Senior Citizens Division.
Neiliang u Kyrmen Shylla da pyntip u wa i kreh wow pynkrehkaam ya uni u Helpline toh deiwa ya soi soskular ki leh liang namo ka Tripartite Memorandum of Understanding hapyrdi ka Ministry of Social Justice and Empowerment, ka Social Welfare Department ka jylla Meghalaya waka PACE Computers haka 15-01-21.
Ya ini da leh neidaw wa da sdang kylla ki manyung heiwa da duna i ya sahlang kiwa chiyung hapoh kawi ka yung iwa da pynman ya kiwa boon kiwa da tymmen wow chah ieh ki khlem da em kiwa kyrchaan wa yarap ya ki, da ong u Montri.
Chooh chooh da ong wa yow yarap ya kiwa da tymmen, ka sorkar da sdang ko ya kiwa boon ki Welfare Scheme lyngba ka chnat Social Welfare, Health Department, Community and Rural Development Department, Food and Civil Supplies Department wa kiwi de. U Kyrmen Shylla da pyntip u leh wa ka sorkar dang pyrkhat ko wow sdang ya ki Old Age Home ha waroh ki District ka jylla ha ki 5 snem wow wan heiwa ka chnat leh daw emkaam ko rap boon ka bhah poisa ha u snem mang poisa wa daw wan yow chna ya ka Old Age Home wa pura ha Mawkasiang yow pynbiang yei thaw sah, i baam, i sumaar kiwa da tymmen ki wym em ya kiwa hayung wa kyrchaan ya ki.
Kiwi de kiwa klam toh u Sampath Kumar, Principal Secretary, Social Welfare Department wa ka C.C. Sohliya , Programme Manager, Elder Helpline Meghalaya.
