Jowai: Ka Nasha Mukt Bharat Campaign kawa man ka thong ka sorkar bei lyngba ka Ministry of Social Justice and Empowerment, wow yakhun pynduna wei pyndooh jait yei pynemkaam drugs, da sdang yaka hynne ka sngi ha West Jaiñtia Hills District heiwa da wai yaka da u Deputy Commissioner ka District u Garod LNS Dykes ha ka yalang wa pynman ha yung krehkaam yong oo hei emlang u Superintendent of Police WJH u Bikram Marak, ka N.M. Sangma Secretary DLSA Jowai, u M. Challam EAC WJH, wa kiwi haka yalang tbian wa pynlai daka J. Synnah District Social Welfare Officer.
Ya kani ka Campaign u pynkrehkaam da ka yung krehkaam u Deputy Commissioner waka yung krehkaam ka District Social Welfare Officer Jowai chirup i yakrehlang wa ki NGO kam ka Manbha Foundation Jowai, ka Society for Urban and Rural Empowerment Jowai, ka Industrial & Institutional Ministry KJP Synod Mihngi Jowai wa ka Sanker Jowai Unit.
Neiliang ka J. Synnah da khana ko wa ka sorkar bei lyngba kani ka Scheme da mang ko khamtam yaki District wa rap chah ktah joor ha i drugs hei wow pynman i pynsñiawthooh yaki bru hajrong i ktah i drugs, wei neini chakhmat daw pynman yei pynsñiawthooh paidbah waphær waphær hajrong kani ka thong katwa u kut won ko hadooh 31 tarik u bnai Wisu (March) 2021.
U Deputy Commissioner u Garod LNS Dykes yooluti u wa lyngba i wai ya kani ka Campaign u man i i myntoi yaka imlang sahlang, wei hei sñiawthooh yong oo yow yoh yei jop iwa emkaam tam toh u ye yakhun neiliang kiwa pynemkaam drug.
Kamtæ heiyatoh wa ini yooluti haroh u wa waroh ki bru u chim ki yei bynta deiwa yakrehlang chirup chirup.
