I pynyabi ya u Aadhaar wa ki EPIC khlem da pynbor kamjooh yow pynsakhiat ya ki Electoral Roll ka West Jaiñtia Hills District da sdang ynne ka sngi ha ka yalang wa da pynman hapoh ka Conference Room u DC, Jowai deiwa emlang u In-charge Deputy Commissioner, u P.K. Boro, ka Additional Deputy Commissioner (Election), ka D.D Syngai, u Additional Deputy Commissioner, u M A Challam wa u Extra Assistant Commissioner, u W.K. Kharbuli.
Neiliang u P.K. Boro da khana u wa ka Election Commission of India da sdang ko ya ini yow lait u em i bakla ha ka Electoral Roll yow ye u pynman ya ka Election kawa khooid.
Da khana u leh wa kiwa em Aadhaar hapoh ka District dang duna bha ki deiwa em du 60%, wei ka sorkar Meghalaya deilang waka UDAI da rai ko wow pynman ya ka 100 sngi yow pynchlur u yaleh Aadhaar. “Deiwa pynyabi ya u Aadhaar wa ka EPIC, da yooluti wow boon kiwa yaleh Aadhaar,” da ong u Boro deiwa khutlang yei ya krehlang yow ye u poi cha ka thong.
Neiliang ka D.D Syngai hawa e ya ki ktien waiphang da ong ko wa da leh yeini u pynyabi ya u Aadhaar wa ka EPIC toh katkam ki kyndon wa da phah da ka Election Commission of India. Wei ini waroh toh dei mon sñiawbha deiwa burom yei hok ki bru. Kamtæ da kyrpaad ko ya kiwa em pyrtuid ha ka Electoral Roll wow wan e ki ya u Aadhaar Number ki ha lane chwa ka 31-03-23 yow ye u pynyabi wa ka EPIC ki yow pynsakhiat yei pyrtuid ha ka Electoral Roll.
Da khana chooh chooh ko wa ya ini i jooh da sdang ha waroh ki Polling Station wei da khut ko yei krehkaam yong ki waroh.
Ha kani ka sngi da emlang leh u President ka Synjuk ki Waheh Chnong Jowai Urban, u Alan Niangti wa kiwa mihkhmat ki seiñ saiñhima, ki sahep sorkar wa kiwa kreh ka chnat Election.
Ya kani ka jooh da sdang leh da u Chief Electoral Officer, Meghalaya u F.R. Kharkongor deiwa ya krehlang waka yung krehkaam ka District Election Officer, East Khasi Hills District ynne hi ka sngi.
U Kharkongor da pyntip u wa daw pynman yei thap pyrtuid kiwa thap Vote soo sien kitæ ha ka 1st January, 1st April, 1st July wa 1st October hawa nujor wa ki snem wa nachwa wa leh du ha ka 1st January man-u-snem. Wei ini daw e laad ko ya ki khynroo khyllood wow em pyrtuid ki hapoh ka Electoral Roll.
Sa iwi wa da pynkylla yow pynsuk toh wa ya ka Form 6 toh du ya kiwa dang thymme kiwa thap Vote, Form 8 toh kawa ye u pynemkaam ya kiwa boon kiwa hap u pynkylla wei ka Form 7 toh kawa ye u pyndait lang ya ka Death Certificate wei wow pynsuk yei pyndam pyrtuid, da khana u Kharkongor.
Da booh leh sa ka Form 6 B neibynta kitu kiwa dang man kam kiwa thap Vote wa thymme yow ye ki u pyndap lang leh chaphang u Aadhaar ki.
Da pynche u leh wa kitu ki wym pynyabi ya u Aadhaar ym mut wa daw chah pyndam i pyrtuid ki kam kiwa thap Vote wei i leh yeini toh yow pyntikna wym em u jooh uwa thap Vote cha kiwi ki Constituency.
