Khliehriat: Ka East Jaiñtia Taxi Owner Driver Association (EJTODA) ynne ka sngi da sylli ko ya ki kari ki bru samen (Private) kiwa kamai pyrchah yaka aiñ hapoh kani ka District hei emlang waka yung krehkaam u District Transport Officer Khliehriat hadien wa yoh ki yaka ujor na kiwa yah Taxi wa ki tre kari kiwa da pynsñiaw yei chem chitom ki wow su Tax cha ka sorkar neidaw wa da boon ki kari Private wa kamai kiwa da tooh yei hok yong ki.
Ha ini i sylli kari, da yoh wow ksoh ya ki kattu katni tylli ki kari Private wa kamai pyrchah yaka aiñ wei pynngat leh yaki haka Section 192A ka MVA kawa da klam che wa ym toh wow kamai kari khlem da yoh Permit. Ya ini i sylli kari da pynman haka chnong Dkhiah kawa em hajan ka yung krehkaam u DTO Khliehriat.
Hadien ini i sylli kari, hawa yaklam wa kiwa thoh khubor, u D. Lamin uwa man u DTO yong ka Khliehriat da ong u wa i thmu yong ki hawa leh ya ini toh neidaw wa boon kiwa yah Taxi ym yoh kamai de ki wot wow su ya i bai kot kari, da pynrap u leh deiwa ong wa i em kini ki kari Private wa kamai, ka sorkar leh da dooh nong ko khamtam na kani ka District heiyatoh waka dan wa toh u yoh na ki Taxi.
Da ong u leh wa ka yung krehkaam yong oo deiwa ya krehlang waka Association u pyrchang ki wow pyndooh jait ya kini i kari ki bru samen wa kamai hapoh ka District khnang wow im-ja kitu ki Taxi wei yow ye ki leh wow su yaka Tax cha ka sorkar. Da ong chooh chooh u deiwa em ki Taxi donhi kiwa kamai, daw pynsuk ko yaki paidbah hei lai i wan wym boi de u em i artatien ki hawa lai emkaam ki cheini cheitai khamtam ya kitu kiwa na baar District wa wan emkaam chapoh yong kani ka District, wei daw pynsuk ko leh yaki khynnah skur wa lai skur deiwa chong ki daki Taxi, kamtæ da paan u leh i yakrehlang naki paidbah kam chibynta wow ye u pyndoohjait ya kini ki kari Private wa kamai, da ong u leh wa daw pteiñ wow sylli man-ka-sngi yaki kari samen.
U Tiplang Rymbai hawa klam u kam u President yong ka EJTODA, da khut u yaki paidbah wow yakrehlang ki waka Association deilang wa u DTO kam chibynta wow pynsuk ko ya ki paidbah ka District waroh kawi, da kyntu u leh ya kitu ki kari Private kiwa kwah wow kamai wow wan mih noh ki chapoh ka yung krehkaam u DTO wow yaleh Permit yow ye ki u kamai, wei katkam wa man kattæ, u DTO dang e mynkna u yaka Permit.
Da ong u leh wa ka Association dawa booddieñ chooh chooh ko ya kani ka kaam kam chibynta wow wanrah ya i kylla haka District kam wa man ha kiwi tawan ki District, da ong u leh wa ka Association u yakreh ko wa ka yung krehkaam u DTO wow pteiñ yeini i sylli yaki kari Private wa kamai.
