Shillong: U Montri Rangbah ka jylla, u Conrad Kongal Sangma da ong u wa ka sorkar da pynkhreh lut ko ya kiyi kiyi kiwa ka liang pyrchah kwah ko wow yoh yei pynche, deiwa pynrap wa ka dorbar man ko ka laad ya ka sorkar wow pynche ya waroh iwa da pynbaad.
Da ong u wa ka sorkar da tip ko ya ki phang wei man ko kawa da khreh ym du wow pynche cha ka liang pyrchah, tangwa cha ki paidbah kiwa chong chnong ka jylla.
Kam wow kdaw wa ka seiñ Indian National Congress (INC) kawa em ha ka liang pyrchah hapoh ka jylla, da pynkhreh ko wow wanrah chiboon ki phang yatai, khamtam wow sngoh yei tkoh i krehkaam ka sorkar jylla nadooh i yakhun wa i pynlut pynsep hawa yatoh wa ka khlam COVID-19, i pynbaad wa em i chalan pyrchah yaka aiñ ya u mooyong na ka jylla wa i pynchit yong ki kattu katni wow pynkhai im biang ya i jia ha Ichamati iwa da wanrah yei sñiaw yaphær jaitbru, nalor kiwi ki phang kiwa ktah ya ka jylla.
