Ka seiñ Hynñiewtrep Border Dispute Redressal Forum (HBDRF) ha ka 15 tarik uni u bnai da lai ya syllok ko wa ki waheh chnong ka Elaka Labang Nangphyllut heiwa da yoh wow seiñ ya ka Synjuk Waheh Chnong Elaka Labang Nangphyllut deiwa emlang u Chandame Sungoh, Chairman ka HBDRF wa u Acting Dolloi yong kani ka Elaka, u Prolin Samaiang.
Ya ka yalang da pynman ha ka chnong Mooriap, Raij Labang Block-I deiwa emlang ki 14 ngut ki waheh chnong napyrdi ki 20 tylli ki chnong kiwa em hapoh ka Elaka wei da i rai lang yong kini ki 14 ngut ki waheh chnong, da mynjur wei pynskem noh ya kani ka Synjuk ki Waheh Chnong Labang Nangphyllut. Katwa ya kiwa kitkaam wa ki kyndon krehkaam ka synjuk daw jied wei pynskem ha kawi won ka yalang kawa daw man ha kini ki kajiak sngi.
Ki waheh chnong kiwa emlang ha kani ka yalang toh u Loukas Shadap, waheh chnong Nongjrong, u Ping Samaiang, waheh chnong Moorap, u Loi Thaiang, waheh chnong Mooriap, u Joplin Sutong, waheh chnong Laher, u Jra Thaiang, waheh chnong Umsalait, u Sting Shadap, waheh chnong Bandeiñ, u Jra Larom, waheh chnong Khyndeliar, u Six Lyngdoh, waheh chnong Mooknor, u Kaïaphas Sutong, waheh chnong Syrlong, u Rostom Larom, waheh chnong Mynju, u Monsingh Lyngdoh, waheh chnong Mookhim, u Kris Bhoi, waheh chnong Arbon, u Petrus Samaiang, waheh chnong Lamarang neitæ u waheh chnong ka Phlang, ki Secretary wa ki bru waheh yong kini ki chnong wei da wan wow sakhilang leh da ki spah ngut ki paidbah kynthai wa chynrang.
Najrong i sneiñ ya kani ka synjuk, da yoh leh wow pynsñiawthooh ya ki paidbah hajrong ka yurim wei yei sakhiat hawa yatoh wa i yaleh wow pynpoi biang namo wow Re-Transfer biang ya ka Block-I cha Meghalaya.
Da rai leh wow lai yaklam wei wow booddien biang ya ka dorkhat wa da dep e cha u CEM ka Jaiñtia Hills Autonomous District Council haka 28 tarik Duiyatra (Jan) 2022 hajrong ka phang phang Re-Unification of Elaka Labang Nangphyllut Dolloiship. Da rai leh wow lai yaklam wa u Deputy Commissioner yong ka West Jaiñtia Hills, ki MLA wa ki Montri sorkar yong ka jylla Meghalaya hawa yatoh wa ka Election Photo Identity Card (EPIC) Enrollment yow yoh u thap pyrtuid ya kiwa chong chnong katkam ki chnong wa sah ki.
Da dawa leh wow pyndep noh smat yei pynbait pood hapyrdi ka jylla Meghalaya-Assam deiwa phah noh ya ka Block-I cha Meghalaya.
Ki paidbah da kyrpaad ki leh ya ka sorkar Meghalaya wym toh u pdiang lane soi yaka MoU lym da ka sorkar Assam ym smat ko wow phah ya kani thaw kamwa da tyrwa nadooh ka 23-02-1958.
