Jowai: Hadien wa ki wakreh Contractor kamjooh ki Supplier hapoh Ri-Loom Jaiñtia, da chem ki ya iwa boon i eh ha ki bynta waphær waphær, ynne ka sngi kiwa pynman yaka yachem lang da rai ki wow seiñ noh ya ka Jaiñtia Hills Contractor and Supplier Association (JHCSA), ka wow pait ya ki kaam wa khia wa chon wa i eh yong ki.
Neiliang u General Secretary u Moonlight Daw da ong u wa kam ki wakreh Contractor wa Supplier ki da yachem ki chiboon i eh heiyatoh wow yoh kaam yoh jaam wow kreh, neibhah kamwa man hi katni ha ri-loom Jaiñtia kiwa yoh kreh lane kiwa man kiwa Supply ha ki chnat sorkar waphær waphær yong ka sorkar toh du kiwa heh spah wei kiwa em ki heh ki haiñ wa yarap ya ki, katwa ki bru paidbah won chem chitom chiboon wow yoh kreh.
U General Secretary da ong u leh wa kam ki Contractor wa Supplier chem chitom ym du haka yoh kreh wei hadooh i rukom yoh Bill ha ki kaam wa da dep pynkreh wei ym jooh yoh katkam ka hok wa toh u yoh, neidaw wa chah ksih beiñ ha ki heh yong ki chnat waphær waphær.
Kiwa kitkaam kani ka Association, kynthup ya u Lakhon Biam kam u President, u Moli Phawa kam u Vice President, u Moonlight Daw kam u General Secretary, u Lamki Shadap kam u Assistant Secretary, u Pyrkhat Shylla kam u Finance Secretary wa 20 ngut ki dkhot ka EC.
Discussion about this post