U President ka ri India ynne da thung u ya ka PT Usha wow man kam ka MP ha ka Rajya Sabha, kam wow kdaw heini u President ka ri ye u wow thung hadooh 12 ngut ki bru wa pawnaam ka ri kam ki MP ka Rajya Sabha katwa 238 ngut toh kiwa chah jied yow mihkhmat ya ki jylla.
Ka PT Usha ya kawa da jooh khut maya leh kam ka ‘Golden Girl of India’ wa ‘Payyoli Express’ da kha ya ka ha ka 27 Naiynru 1964 na Kerala wei neidaw wa ka’it ko wow lehke Sports da yoh ko ya ka Scholarship wa T. 250 na ka sorkar jylla Kerala wei da chem hiwot yei sap yaphet ko toh ha ka National School Games 1976.
Ka Usha da yoh ko hadooh palat 100 tylli ki takma hapoh ka ri wa cha baar ri. Da yoh ko leh ya ki 13 tylli ki takma ksiar ha ka Asian Championships heiwa ynru tylli na kini toh ha ka Jakarta Asian Championships 1985. Da yoh ko leh soo tylli ki takma ksiar ha ka Seoul Asian Games 1986.
Kiwi kiwa da chah thung kam ki MP ynne kynthup ki ya uwa chna sur, u Ilaiyaraaja, uwa kreh mon sñiawbha u Veerendra Heggade wa uwa thoh kot, u V. Vijayendra Prasad.
Ki MP ka Rajya Sabha toh kawa skem ka wym ye u pyndam namo ka Permanent Body heiwa daw pynchongngiah ya chibhah na ka le bhah (1/3) ki MP man ka ar snem iwa man wa ki MP ka Rajya Sabha u man MP ki hadooh 6 snem.
Neiliang u Montri Rangbahdooh ka ri, u Narendra Modi leh da kitbok u ya ka Usha.
