Da thung ya ka takit wa laitlooid hajrong i jia ha MCH Jowai: DC

Ynne ka sngi u Deputy Commissioner ka West Jaiñtia Hills, u Abhinav Kumar Singh da pyntip u wa da thung ya ka takit wa laitlooid yow chem yei daw wa yap ka manbei wa punkhon ha MCH Hospital, Jowai.

U Abhinav da ong u wa kani ka manbei toh ka Pynchei Bareh na Jalaphet wei da khlaad ko ynnin i miet heipor 9:30 heiwa da thiah chwa ko ha Sutnga CHC ha ka 2 tarik wei ha ka 3 tarik da kit noh ya ka cha MCH Hospital, Jowai heiwa da ood ko wa em chitom ko.

Da ong u wa katkam wa ong ka Medical Superintendent ka MCH Hospital, da pyntip ko wa ka Pynchei ymye ko u baam neidaw wa chitom ko wei ym em ood ko hadooh 2 waje ka 4 tarik wei heipor 5:30 i janmiet da ood soohkpoh ko wei da pynthiah ya ka ha High Dependency Unit heiwa da pait ya ka langær da kiwa kreh.

Heipor 8:10 i miet da rap chitom joor ko wei da khlaad noh ko heipor 9:15.

Related posts

Dawa ka JSU wow booh CUET Exam Centre ha Jowai

June 6, 2025

Yoh ka Rikadeisuk Suting ka Nurse na Supercare Hospital yei naam Young Leader Award

June 6, 2025

Chooh chooh da pyntip u wa da pynman ya ka takit da ka Internal Committee wa da chna da ka Medical Superintendent ka MCH Hospital wei da em leh ka dhab wa thung da ka Directorate of Health Services wa da khlieh da u Jt. Director ka chnat Health ka wow takit yeini na ki Doctor wa ki tre yung.

Heijooh i por da ong u wa khnang wow yoh ya ka takit wa khooid kawa khlem chah chiliang da thung ya ka takit wa laitlooid wow khlieh da ka ADC ka District, ka B. Blah, ka District Medical and Health Officer ka West Jaiñtia, ka Dr. P. Shylla wa ki Doctor Gynaecologist wa Paediatrician na East Jaiñtia Hills.

Da pyntip u wa hadien wa yoh ya ka bui (Report) na ka takit ha i janmiet ka 9 tarik daw phah won cha ka sorkar yeiwa chem na ka takit.