Ka Voice of the People Party (VPP) da yoh ko yei tipmit kam ka State Party ka Meghalaya, da pyntip da ka Election Commission of India (ECI) ynnin ka sngi hadien wa da ye ka VPP wow pynhun ya ki kyndon katkam ka Para 6A ka Election Symbols (Reservation & Allotment) Order, 1968 yow yoh yei tipmit.
Yow yoh yei tipmit kam ka State Party, emkaam wow jop ha Election wei ymtoh u duna u yoh ki 6% ka Vote heiwa ka VPP da yoh ko 9.75% wei da jop ko 4 ngut ki MLA.
Ka Election Commission da e laad ko leh ya ka VPP wow jied ko ya u chap wa dang lait wa kynthup ya u Prah.
Ha iwi won i liang, ka ECI da pyntip ko wa da pyndooh yei tipmit kam ka National Party ya ka All India Trinamool Congress (AITC), Nationalist Congress Party (NCP) waka Communist Party of India (CPI).
Ka BJP, Congress, CPI (M), Bahujan Samaj Party (BSP), National People’s Party (NPP) waka Aam Aadmi Party (APP) toh kiwa da yoh u man kam ki National Party.
Kiwa da dooh won yei naam State Party hapoh ka ri toh ka RLD ha Uttar Pradesh, ka BRS ha Andhra Pradesh, ka PDA ha Manipur, ka PMK ha Puducherry, ka RSP ha West Bengal waka MPC ha Mizoram wei kini u man noh ki kam ki Registered Unrecognised Political Parties (RUPP).
Kiwa dang tipmit thymme won kam ki State Party najrong ka VPP, toh ka Lok Janshakti Party (Ram Vilas) ha Nagaland waka Tripra Motha ha Tripura.
