15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Da toh i por wow khyrngiat ki bru wow dam noh u pynemkaam ya ki Plastic

0 Comments
Advertisement ad1

Jowai: Ka yungkrehkaam u Deputy Commissioner ka West Jaiñtia Hills ynne ka sngi da leh warom ko ya ka “World Environment Day” deiwa sdang da ka yalang ha Conference Hall u DC ka WJH wei pynbood won sa ka thung dieñ.

Ya ka yalang da pynlai da ka Y.R. Mawlong, EAC kawa da ong wa kini ki 10 snem toh kiwa chit dooh hapoh ka ri India heiwa ka la-ær wa riñ mynsien ki bru man ko kawa tngit bha, i chaniah ha i Petrol wa Diesel leh da ku bha ko, i chah ah ki khloo i tynyap ya ki mraad khloo leh da ku bha i.

Advertisement ad1

U I.R. Marbaniang, ADPM, DBDU, WJHD hei klam yong oo da ong u wa man ko i kitkhlieh yong uwi pa uwi wow pynduna yei pynemkaam Plastic wei da boon ware i em i Plastic hapoh pyrthai katni.

U C. Najiar uwa mihkhmat ya ka tnat Forest ka West Jaiñtia Hills da ong u wa da toh i por wow khyrngiat ki bru wow dam noh u pynemkaam ya ki Plastic neibhah na chiteiñ na ki Plastic wa pynemkaam ki bru kut ki cha ki loom ki wah ki luti ki syngkieñ wei hapoh pyrthai kamwa 13 Million Tonne toh kiwa ym em wa pyllang ki.

Neiliang u Rev. HH Mohrmen da ong u wa da eh bha u pyndam syndon wow pynemkaam ya ki Plastic neibhah da em ki ha waroh ki tiar ki tar wa pynemkaam i nadooh u khulom hadooh ki Camera wei ye hi leh wow pynduna yei pynemkaam ya ki Plastic deiwa kyntait wei lada ym ye u kyntait toh u pynemkaam ki boonsien wei wow Recycle ya ki.

Da pynchlur u leh ya ki bru wow pynemkaam biang ya ki muna jun wei wow pyrkhat leh ya ka juk wow wan.

Neiliang u DM Wallang da ong u wa da emkaam ya kiwa chong chnong ka Jowai wow yakrehlang wa da yoo sarom ware yei tngit ka Iawmusiang wow thooh buit kammon u leh yow ye u leh ya ini.

Da pynkut ya ka yalang da i thung dieñ ha pchem yungkrehkaam u DC heiwa ha kani ka kynti da e laad da ki Chowkidar wow thung dieñ deiwa booh lang yei pyrtuid yong ki yow sumaar ki ya kini ki dieñ neibhah ki sahep toh kiwa daw chah kyrriah kreh na ki por cha ki por.

Share this:
Previous

Ki paidbah da dooh ki yei chaniah ya kani ka sorkar wa katni: Dr. Mukul Sangma

Next

Ki ar sngi kam ki sngi khang kiad ha WKH