U Chief Whip ka liang pyrchah ha yung dorbar chna aiñ uwa man leh u MLA ka Congress na Mawlai, u Process T Sawkmie da ong u wa ka sorkar India toh u e noh ko ya ka Inner Line Permit ha ka jylla Meghalaya kamwa angnood ki paidbha ka jylla, wei lada ka sorkar India slem ko u pynkrehkaam yeini, da toh i por wow yakhih deiwa rah ya ki Placard ha Delhi hakhmat ka Parliament ha kani ka dorbar mang tyngka (Budget Session) wow dawa ILP.
Da e nongmuna u leh ya ka yakhih ki warep hadien wa wanrah ka sorkar pyrdi ya ka aiñ Farmers Act, iwa da neh kattu da palat chibnai tam, wei ka jylla leh toh u yakhih ko ha Delhi khnang wa ka sorkar India u tip ko wa ka jylla emkaam ko ya ka ILP.
Hajrong i klam u Amit Shah ha Manipur, wa ka sorkar India e sñiawbha Christmas ko da ka ILP khlem paan, u Sawkmie da ong u wa i e ya ka ILP ha Manipur toh neidaw wa ha kani ka jylla leh da yahkhmat da ka sorkar ka BJP, katwa ha Meghalaya ya ka Sorkar da yahkhmat da ka NPP, deiwa pynrap wa ini i leh ka sorkar BJP na Delhi pynyoo i wa ym mano ko wow e ya ka ILP ha Meghalaya.
Da ong u wa ka sorkar BJP na Delhi emkaam u tip ko wa ki arngut ki MLA ka BJP ha ka jylla embynta ki wow wanrah ya ka rai yonglang namo ka Resolution ha ka Yung Dorbar wow dawa ILP ha Meghalaya, wei emkaam u burom ko leh ya ini i rai ha ka jylla.
