Ka Joint Co-ordination Committee for Reservation Policy (JCCRP) kawa kynthup ya ka Synjuk Waheh Chnong Ri Jaiñtia, Synjuk Waheh Chnong Jowai wa ki seiñbhalang na Ri-loom Jaiñtia kiwa kynthup ya ka JSU, JYF, JSM wa ka EJNC ynne da phah dorkhat ki cha u montri rangbah ka jylla, u Conrad A Sangma.
Ha ka dorkhat da thoh wa ha ka 12 tarik uni u bnai da chong yalang ka JCCRP wow yaklam neibynta ka State Reservation Policy.
Ka JCCRP da chim ko ka rai wow pyndam chwa ya ka Reservation Roster neibhah nadooh wa em ka Reservation Policy da emkaam ya ka sorkar jylla wow sylli namo Review biang ko ya ka State Reservation Policy kawa nadooh u 1972.
Chooh chooh da ong ko wa kat dang lai ki por i boon ki bru ha ki le jaitbru dang ku i wei kani ka Reservation Policy man ko kawa thæh chiliang neibhah ki Garo myntoi bha ki deiwa yoh hadooh 40% ka bhah ha ka State Reservation Policy katwa ki Khasi wa Jaiñtia hap yakhun ki para ki neibynta ka bhah wa du 40%.
Kamtæ da ong ko wa da toh i por wa ka sorkar u sylli noh ko ya ka Reservation Policy ka wow myntoi salonsar ya waroh ki le jaitbru.
