U symbood montri rangbah ka jylla u Prestone Tynsong ynne ka sngi hawa pynbna yei rai ka sorkar jylla da ong u wa da rai wow pdiang yei tyrwa ka chnat Transport wow pynthymme yei bai kari.
Neibynta ki kari kamai kam ki Mini Bus i bai kari warim man i T. 1.05 uwi u bru chi Kilometer wei da pynku ya ini cha T. 1.80 uwi u bru chi Kilometer.
Yaki kari wa chong bru 7 ngut hadooh 12 ngut won, i dor warim man i T. 2.05 chi khlieh chi Kilometer katwa iwa thymme won u man i T. 3.60 chi khlieh chi Kilometer.
Heiyatoh won waki Local Taxi waki Autorickshaw, u Prestone da pyntip u wa da dep wow pynthymme ya i dor yong ki ha u Duiatra (Jan) uni snem heiwa yaka bai kari ki Local Taxi toh T. 26 chi Kilometer kawa tip kam ka Basic Fare wei daw hap su sa T. 13 hadien kawi pa kawi ka Kilometer wa lai. Katwa yaki Autorickshaw won T. 14 chi khlieh wei sa T. 6 chi Kilometer hadien kawi pa ka kawi ka Kilometer. Da ong u wa kini ki dor u neh hi ki neidaw wa chem wa man ki kiwa dang biang.
Hawa kylli won wa hapoh ka jylla i rukom chong Taxi toh deiwa ya chong lang namo ka Share Taxi u Prestone da ong u wa hapoh ka aiñ ym em kam kitæ ki Share Taxi wei da yaklam leh waka chnat Transport wow pynkhreh noh yaki Meter yow kheiñ yei jngai lai luti kamwa da leh cha kiwi ki bynta ka ri.
Da ong u kattu neidaw wa em ka khlam COVID-19 da toh leh i por wow pynkylla noh ya i rukom chong kari kamai neibhah ka kyndon da chah ko du 2 ngut wa uwi wa yah u em hapoh kari khian.
Chooh chooh da ong u wa iwa leh hapoh ka jylla nadooh nachwa toh dei ya sñiawthooh kiwa chong kari wa kiwa yah kari wow su deiwa yabhah yaka bai kari iwa ym em kam ini hapoh ka aiñ wow leh kamni wei da toh i por wow pynkylla noh yeini khamtam ha kam kini ki por.
Ha iwi tawon i liang, da pyntip u wa ka sorkar da mynjur ko leh yaka Draft Motor Accident Tribunal Procedure kawa man katkam wa da phah daka Supreme Court waka High Court kawa yatoh wow pait yaki ujor wa yatoh i wym su ki Insurance Company yaka bai Insurance manda em i tyrrah kari.
