I pynbaad hapyrdi ka BJP wa ka NPP da mih pyrthai i sa hapyrdi ki Montri kiwa em ha ka sorkar heiwa ynne ka sngi neiliang u Symbood Montri Rangbah, uwa man leh u MLA ka NPP na Pynursla, u Prestone Tynsong da klam khor u pyrchah ya ka BJP deiwa ong wa da toh u mih noh ki 2 ngut ki MLA na ka sorkar MDA lada sñiaw ki wa kani ka sorkar toh kawa baam-tooh.
Da ong u wa ym emkaam de ya ka BJP neibhah neipor cheipor da yaklam yeini heiwa ka BJP leh em ko ki MLA wa uwi u Montri ha ka sorkar wei lada sñiaw ko wa sum ko ha i jooh i ktieh neiyi i daw wa em ko ha ka sorkar, da toh wow mih hi noh ko na ka sorkar.
Hawa kylli won na uwa yahkhmat ka BJP uwa man leh u Montri ha ka sorkar MDA, u Alexander Laloo Hek, da ong u wa ym phær iyi iyi lada hap wow mih noh na ka sorkar neibhah heipor wa chna ya ka sorkar MDA da rai lang wa ka BJP nadooh Delhi wei iyi wa rai ka BJP na Delhi ha kani ka jylla hap kohngooh.
Da ong u leh wa nadooh wa chna ya ka sorkar da leh deiwa tip nadooh na Delhi ym du na ka BJP Meghalaya wei lada toh u dam noh u kyrchaan ya ka sorkar toh i rai na Delhi donhi.
