15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Daw man ka Election chiteiñ samoi ha Mawryngkneng kawa phær neidaw ki kyndon COVID-19: F. Kharkongor

Ka Election Commission yong ka jylla da pynkhreh ko neibynta wow pynman yaka Election chiteiñ samoi ha 13-Mawryngkneng Constituency, wei ka chnat Election yong ka jylla dang yang ki sa du yaka tarik wow pynbna da ka Election Commission of India. Kani ka Election u man ko kawa rap phær na kiwi won ki Election neidaw wa daw hap pynman hapyrdi ki kyndon wow yada naka khlam COVID- 19.

Hawa yaklam wa u Chief Electoral Officer ka jylla, u Fedrick R Kharkongor uwa da ong wa kani ka Election daw phær ko na kiwi won neidaw wa daw em leh u Nodal Officer na ka chnat i chait i khiah, chibynta wow bood ya ki kyndon wow yada nei yabi ka khlam COVID-19, heiwa da pyntip u wa ka chnat da dep ko wow chong leh ya ka Review Meeting wa ki bor pynlai District, wei da pynkhreh na waroh ki liang lada pynbna ya ka Election ha iwon iwon i por.

Da pyntip u wa neibynta katai ka Election da pynyang kamwa 100 tylli ki kor thap Vote (EVM), wai da pan leh sa kamwa 30 tylli ki kor na jylla Mizoram yow pynyang lada emkaam jhan.

U CEO da pyntip u leh wa ha kani ka Election, neiliang ka State Election Commission daw pynmih ko leh ya ki kyndon nadooh wa thap pyrtuid ki kyrtong, ki kyndon wow yalap Election, wei khamtam wa kyrpang leh na i bynta ki tymmen kiwa da em palat 80 snem wa kiwa duna hei doh i pran wow thap Vote da ki Postal Ballot, wei daw booh leh ya ki Online Services wei hajrong ini da phah ya ka Deputy Commissioner wow ya syllok wow pynche cha ki seiñ saiñpyrthai.

U Kharkongor da pyntip u wa ka Mawryngkneng em ko 54 tylli ki Polling Station wei na i bynta wow yada na i boon lang kiwa thap Vote, kawi ka Polling Station ym toh u em palat ya ki 1000 ngut kiwa thap Vote, heiwa da pyntip leh wa em 2-3 tylli ki thaw thaw Vote kiwa tam ya 1000 ngut wei kiwa hap phiah noh.

Hawa kylli wa lada da phah pynman deilang waka Election kam ha Assam, Tamil Nadu wa West Bengal ha u Naitung (April) uni u snem, neiliang u CEO da ong u wa katkam ki kyndon, da jooh e por 6 bnai nadooh wa thylli i kaam, tangwa da yooluti wa daw ye u pynman lang ha i jooh i por wa kitai ki Election.

Kam wow pynkynmoo wa ya ka Election chiteiñ samoi ha Mawryngkneng da hap wow pynman hadien wa khlaad syndet u MLA wa da jop arsien, u David Nongrum ha ka 2 tarik uni u bnai.

Share this:
Previous

I dawa ILP ym mut i wa pyrchah ya ka ri India: Process T Sawkmie

Next

Da toh u mih noh ki 2 ngut ki MLA ka BJP na ka MDA: Prestone