Ynne ka sngi ha ka Regional Conclave hajrong ka phang “Regional Aspiration, National Outlook” wa pynman da ka Arunachal Unit ka National People’s Party (NPP) ha nongbah Itanagar neiliang u Montri Rangbah ka jylla, u Conrad Sangma da ong u wa lada ong bait i wa wa kwah i ya ka ILP wa ka Work Permit, da ngait skem u wa wot kiwi leh ngait ki wa emkaam wow mih noh cha lait ini i rukom pyrkhat neibhah ini wanrah i ya iwa boon i sñiawthooh bakla i wow pynneh chithaw donhi.
Da ong u wa iwa boon dooh i eh i khoo wa chem i toh hei khayi pateiñ iwa boon ym kwah ki wow ngam yillu tangwa em ki laad wow pynbait yeini tangwa i neh i chithaw donhi.
Da ong u leh wa kamwa man katni hapoh Bangladesh da em hadooh chi lak ngut ki Garo (hadien wa phiah ya ka ri India namo ka Partition) wei na kini da em ki sahep kiwa man ki Doctor, ki Engineer wot hadooh kawi ka kynthai wa khlieh ya ka Bangladesh Civil Services wei da man i neidaw wa em i yaleh hapyrdi ki paidbah ha kani ka ri.
U Conrad da ong u leh wa da boonsien da lai yaklam ya ki phang wa hakhmat dooh wot cha Delhi heiyatoh wa ki jaitbru tangwa tieñsar wa ya kini ki phang kiwa boon na ki paidbah ymtip ki ya ki deiwa ban joor u leh wa da toh i por wa emkaam wow em kawi ka rynsaan wow yaklam ya kani ka phang dei yonglang khnang wow lait na iwon iwon i sñiawthooh bakla hapyrdi ki paidbah.
Heijooh i por da ban u deiwa ong wa ki kaam ka ri wa ka jylla ye ki wow lai chirup deiwa kyruiñ ya i myntoi ka ri hi waroh kawi.
Da ong u leh wa em ki por hawa yieñ neibynta ka ri da em ki bru wa ong wa da pyrchah yei myntoi ki paidbah tangwa lada kyruiñ cha i emkaam ka jylla hajrong ka ILP lada yoh næ ymyoh, iwa emkaam toh i wan psiah tooh ki baar ri wei ini da wanrah i yei sñiawthooh bakla.
Hajrong ini da e nongmuna u leh wa hawa em i kajia pood hapyrdi ki jylla da mih i pynkhor na waroh ar liang ki jylla tangwa emkaam wow wanrah ya waroh ki ar liang mamla wow yaklam hajrong ini.
