Ynne ka sngi hawa klam heiyatoh wa i klam u Lat ka jylla ha ka Yung Dorbar Chna-aiñ ka jylla, neiliang u MLA ka Mowkaiaw, u Nujorki Sungoh da ong u wa ka sorkar Assam ym em u burom ko ya ka Status Quo deiwa chna ya kiwa boon ki kreh ha Block 1 wei ha u bnai wa dadep heithaw wow kyrriah ya ka Forest Check Gate na Mukroh katni da chna pynheh pathan ki ya ka ha i jooh i thaw wei katni da chna ko sa ya u sarok thymme ha ini i thaw tangwa manda kreh ka sorkar Meghalaya iwon iwon da chah pynsangeh bait i.
Heiyatoh wa ka bynta wa ar yong i klam pynbait pood, u Nujorki da ong u wa em 36 tylli ki chnong Pnar ha Block 1 wei emkaam wow wanrah biang ya ki chapoh Meghalaya neibhah ini toh i kwah ki paidbah na kini ki chnong wei wa kini ki chnong da chah iehbeiñ bha ki da ki spah snem kattu.
U Nujorki da pynkynmoo u leh wow pynku kyrdan ya ka Laskein C&RD Block cha ka Civil Sub-Division neibhah kani ka kaam da man ko kawa sahteiñ nadooh u 2003.
Kiwi ki mat wa da klam u Nujorki toh wow kyrchaan ya ki manyung kiwa da dooh ya u pa yong ki ha i chah siat yong ki ha ka 22 Khonchonglad 2022 wei wow chna ya ka UP School ha kani ka chnong wei wow pynku kyrdan ya ka Sub Center ha kani ka chnong.
