Shillong: U montri ka sorkar jylla uwa pait ya ka tnat Public Health Engineering (PHE) u Samlin Malngiang da ong u wa ki Khasi ki da sdang ki wow lehkhooid da ki spah snem nachwa wei hadooh katni dang em ka pynkhooid ya ki chnong man u snem, tangwa dang em ki bru ki wym sñiawthooh yei lehkhooid.
U Malngiang da pynsñiaw u leh yei rukom man ki paidbah ha ka juk wa katni ki wym kheiñ de yei emkaam i khooid i jngiar kiwa da noh jhep kat cha wa yoh.
Ya ini u montri jylla da ong u hawa klam ha ka yalang yalap leh khooid kawa da man ha Mawklot, East Khasi Hills heiwa u montri khynnah ka tnat kor baar ri, u MJ Akbar da emlang u.
“Hadooh katni i da pynkhooid chnong i man u snem chwa wow wan ka Swachh Bharat,” da ong u wei da pynrap u leh deiwa ong katni won da em ki bru wa khlem akor kiwa pyntaroi waroh soo dong sookun.
Hawa pynsñiaw yei chrai u yei wym kheiñkor ki kattu katni manda booh ya ki thaw wym hoi u noh jhep toh u thoh noh ‘Phi ki mrad khloo, ksaw pohjait toh u noh jhep heini.’
U Malngiang da ong u leh toh u booh noh da ki dur Blai ha ki kdong ki chmiang wa ki chram yow lait na i jung ki khlemakor ki paidbah.
Hawa pynksan ya ini da ong u, “Hawa lai O cha Kolkata, ha kawi na ki kdong da booh ya ka dur Blai, hawa kylli bniah da chem wa ha ki por wa wym em ki dur Blai boon ki bru kiwa lai jung ha kini ki thaw tangwa da duna nadooh wa booh ya ki dur Blai wei cha i leh toh u sdang noh ya ini.”
Discussion about this post