Ka dhab ki montri ka sorkar jylla ynne ka sngi da chong ko ya ka yalang wa jhan wow yaklam hajrong i man i long hapoh ka jylla heiwa da rai wow thung noh da ka Judicial Enquiry hajrong i chah siat u General Secretary warim ka HNLC, u Cherishsterfield Thangkhiew ha i step ka 13 tarik uni u bnai.
Hawa yaklam wa kiwa pathai khubor, u Montri Rangbah ka jylla, u Conrad Kongal Sangma da ong u wa khnang wow chem yeiwa sakhiat waroh, ka sorkar da rai ko wow thung da ka Judicial Inquiry wow takit da uwa bichaar ka High Court, wei ha i jooh i por ka sorkar da rai ko leh wow chna da ka Peace Committee wow khlieh da u Symbood Montri Rangbah, u Prestone Tynsong, heiwa daw emlang u Renikton L Tongkhar wa u Hamletson Dohling kam ki dkhot wei daw kynthup leh ya ki khlieh niam wa kiwa heh chnong wa ki seiñ kreh monsñiawbha.
U Conrad da ong u wa ka sorkar da yaklam yillu ko leh hajrong i suk i saaiñ ha ka jylla khamtam ha ki 48 kynta wa da dep wa da em yakhih iwa da ktah ya i suk i saaiñ ha Shillong wei kamjooh leh i man i long ha ki kajiak bnai wa dadep nadooh wa pdung bomb ha Khliehriat wa ha Shillong.
Da chong yaklam leh hajrong i man i long ha ki 5 sngi wa da dep nadooh wa chah siat u Cherish ha ka 13 tarik.
