Jowai: Kiwa chong chnong yong ka Mowtyrshiah pyllun ha ka dorbar wa da man ha ka miet 24 wa 26 tarik uni u bnai da rai wow pynyieñ MDC biang da u Winning G Sungoh na ka 14-Mowkaiaw Constituency ha kani ka Election MDC wow wan cha ka JHADC.
Ha ki yalang wa pynman da kiwa yahkhmat ka chnong ha Mowtyrshiah A wa B da i wi i sur da rai ki wow kyrchaan pura ya u Winning G Sungoh wei ha kini ki ar tylli ki yalang da em lang leh wa ki ar ngut ki waheh chnong yong ka chnong Mowtyrshiah A wa B wa ki dkhot Committee ka chnong deilang wa ki hajar kiwa chong chnong kiwa da poi cha kani ka yalang.
Kiwa klam ha kani ki sngi kynthup ki ya ar ngut ki waheh chnong ki bru paidbah kiwa da yaroh ya ki kaam wa u Winning da leh u du hapoh san snem kiwa chiboon wow wanrah ya ki kaam pynroi hapoh ka Constituency, kamtæ da kyrpaad ki ya oo wow yaleh biang ya kani ka Election wei ki da kular ki wow kyrchaan tylli ya oo ha kani ka kynti.
U Winning G Sungoh hawa klam da e khublei u ya ki paaid wa chong chnong waroh wei da ong u wa hei sakhiat ym em de mut u wow yaleh ya kani ka Election wei wow e laad noh ya kiwi tangwa hadien wa ap ya ka sur yong u paidbah da rai u wow pdiang ya kani ka rai wow yaleh biang ha kani ka kynti wei da kyrpaad u leh ya ki paidbah wa ki u pynjop em burom biang ki ya oo khnang wa oo u ye u wow chakri biang ya ki paaid yong ka Constituency.
Discussion about this post