Uwa yahkhmat ka Liang Pyrchah, u Dr. Mukul Sangma da ong u wa ka Shillong Peak Ropeway Project ye pathan ko wow ktah ya ki kaam uiñke suwari neidaw wa ka sor Shillong toh kawa da khynnia chwa wei kawa sahkut kari bha.
Hajrong ini da ong u wa ka sorkar toh u kyrriah noh ko ya kani ka Project cha kawi won ka thaw.
Da ong u wa i khynnia kari ha Shillong toh iwi na ki daw wa ktah bha ya kiwa wan-ke wei ymtoh wa duna kiwa wan-ke, kamtæ da emkaam wow pynbait yeini neibhah i sahkut kari nang joor i kat dang lai ki sngi.
Da ong u leh wa heipor wa man Chief Minister u, ka sorkar u da sñiawthooh ko yeiwa ye u pynku ya ki kaam uiñke suwari deiwa e ha kti kiwa chong chnong, deiwa tipmit yei emkaam ka dustur riti kamjooh i miat chwa ki soodong sookun wei da booh hakhmat yow pynduna yei khynnia kari ha Shillong.
Da kynmoo u leh wa heitu i por hadooh katwon pynthut ki Truck kiwa sih cha luti syngkieñ ha Shillong wei da ye u lait neini deiwa em ka Shillong Bypass.
Ha itu i por da ong u wa da em ki por wa sahkut kari da 10-12 kynta hadooh wym kwah kiwa uiñke suwari wow wan cha Shillong wei lada bna naam katwa bna naam leh daw sepai lada khynnia wei sepai i por du hei sahkut kari.
U Mukul da kylli u leh wa ileh du ka Shillong donhi mo wa ye u pdiang kam kini ki Tourism Project wei deiwa em ka Ropeway daw pynboon bru ko ha Shillong deiwa kyntait u leh wa deiwa em ka Ropeway daw pynkyllooid ko yei khynnia kari neibhah daw pynjoor chooh chooh ko yei khynnia.
Heijooh i por pdiang u wa ka Ropeway toh kawa miat bha neibynta ki kaam Tourism tangwa ka sorkar hap ko wow pait da kiwi won ki thaw khlem da pynkhia chooh chooh ya ka Shillong deiwa ong wa ini i wanrah ya ka Ropeway ha Shillong da yoo lakam wa lut ki buit wei ymtip leh wow pyrkhat iyi wa ye u jia.





Discussion about this post