Ynne ka sngi u montri ka chnat Information & Public Relations, u James K. Sangma da wai u ya ka Fixed Audio System ka chnat DIPR ha Shillong, East Khasi Hills District hei emlang ka M. War Nongbri, IAS, Secretary ka Information & Public Relations, East Khasi Hills District; u R. Nongkhlaw, Deputy Director ka Information & Public Relations, wa kiwi ki heh ka chnat.
U James hawa e yei klam da ong u wa ka khlam COVID-19 da hikai ko ya i wa kammon emkaam wow pachat ya ki yutip wa tne wei kawa paka wei i em ka Fixed Audio System daw pynjanai ko ya e yutip rap smat wei heipor wa biang cha ki paidbah heiyatoh wa ki rai wa ki kaam wa boon ka sorkar.
U James da yaroh u ya ki kaam ka chnat kawa da pynkrehkaam hok ya kani ka kaam wow e yutip cha ki paidbah ha i por wa biang deiwa ong leh wa ha u snem wa dadep heipor wa em ka Lockdown da mih chiboon ki khubor hamsaya iwa da wanrah yei kulmar wa i tieñsar hapyrdi ki paidbah kamtæ i em kam kani ka laad pathai khubor man ko kawa emkaam bha.
Da pynsñiaw u leh yei kmen ya u montri rangbah ka jylla, u Conrad K Sangma uwa da pynlait poisa ya kani ka kaam kawa daw yarap leh wow pynbna yaki kaam yarap paidbah wa da e ka sorkar.
Neiliang ka Nongbri da ong ka wa i booh ya kini ki tanghæng daw ye u pynemkaam ha ki jar jiar ki thaw lane ha waroh ha i jooh i por deiwa jied kawi lane boon tylli ki tanghæng ka wow krehkaam katkam wa emkaam. Da kyntu ko leh ya u montri wow wanrah ya ini i jooh ha kiwi ki District leh neibynta wow myntoi ki paidbah.
Neiliang u Nongkhlaw hawa e yaki ktien e khublei da pynsñiaw u yei sñiawngooh ya u montri uwa da wanrah ya ini i kaam wa yarap bha, heiwa da pyntip u leh wa da dep wow booh ya ki 21 tylli ki tanghæng kiwa tip kam ki Internet Protocol (IP) Powered Speakers ha ki 21 tylli ki thaw hapoh ka sor Shillong.
