Shillong: Ynnin ka sngi u montri rangbah ka jylla, u Dr. Mukul M. Sangma da wai u ya ka lympung Meghalaya State League 2017-18 (MSL) kawa da pynman ha ka yalang ha Anton Hall.
Hawa e i klam ha kani ka yalang u Sangma da ong u wa ka yalehke Football ha Meghalaya daw ku ko cha kawi tawon ka kyrdan lyngba kani ka lympung wei daw man ko ka thong wow pynku ya kani ka yalehke cha kawi ka thong.
Da ong u wa em chiboon ki kaam kiwa ka sorkar da leh ko hapoh ka jylla wow pynku ya kani ka jait yalehke wei kani ka lympung daw rah ya ka cha kylleiñ ki thaw hapoh jylla ym du hapoh Shillong.
U President ka Meghalaya Football Association, u Larsing M Sawian da pyntip u wa ka MSL da pynwandur ya ka ha katæ ka rukom ka wow pynkhlan ya kani ka yalehke hapoh jylla. Ka MSL toh ka chibynta yong ka Mission Football kawa da sdang da ka sorkar jylla kam wow e khih e kreh ya ki khynroo khyllood ka jylla kiwa em ka sap ha kani ka jait yalehke.
Ha waroh da em 20 tylli ki dhab na Khasi, Jaiñtia wa Garo Hills kiwa da yachimbynta ha kani ka lympung wei daw pynyaleh ya ka ha Jowai, Kurkalang Ri Bhoi, Mairang wa ha Ampati.
Ka yalehke wa nyngkong daw pynman ha ka 16 tarik uni u bnai ha Kurkalang Grounds, Ri Bhoi District.
Kiwi kiwa da em ha kani ka yalang toh u DP. Wahlang, Commissioner & Secretary, Education etc & Lifetime Member, Meghalaya Football Association, ka Director Sports & Youth Affairs, M.W. Nongbri wa kiwi kiwi.
Discussion about this post