Shillong: Ka sorkar jylla da pynbna ko wa daw pynman ko ya ka yalang waka KHADC wa ki Rangbah Shnong ki Sordar wa kiwi kiwi mynstep ka 14 tarik yow ya rai lang wow chim chwa ya ka KHADC (Village Administration) Bill 2015, kawa da sahkut waka Ministry of Home Affairs.
Da chim ya kani ka rai hadien ka yalang wa pynman u Montri Rangba u Dr. Mukul Sangma waka Synjuk Ki Nongsynshar Shnong Ka Bri U Hynniewtrep (SNSBH) wa pynman ha Secretariat ynnin ka sngi.
“Dang yang ya ka KHADC wow e ko ya ka rai wa lada lait ko u yachem mynstep kawa da kular u CEM wow pyntip myntu ka sngi” da ong u Dr. Mukul.
Da ong u leh wa kani ka rai toh katkam ka yalang wa pynman hapyrdi ka sorkar wa ka Synjuk heiwa da pyrkhat wa emkaam u emlang ka KHADC yow lait u mih iwon iwon i sñiawthooh bakla.
U Dr. Mukul leh da ong u wa kani ka aiñ dang emkaam leh ya ki paidbah wow yohlaad u puræ ka yow yohlaad leh wow pynsñiaw yeiwa yooluti ki na kani ka aiñ.
Ynnin u snem ka sorkar leh da e buit ko ya ka KHADC wow li chim chwa ka ka VAB yow chna pynmiat ya ka yow ye noh ko u man aiñ.
Chooh u Dr. Mukul da ong u wa boon ki Bill wa poi cha ka Ministry of Home Affairs yap hi-eh ki khlem yoh ki u man aiñ.
Kam wow pynkynmoo ka Village Administration Bill da phah ka Khasi Hills Autonomous District Council (KHADC) cha u lat ha u snem 2015 yow pynkup bor ya ki Rangbah Shnong wa kiwi kiwi tangwa u Lat wa rim u V. Shanmuganathan da phah pathan u ka cha ka Ministry of Home Affairs (MHA), heiwa boon da ong wa ym jooh jia kamni.
Ka MHA hadien wa bichaar ko ya ka VAB, ha ka chithi da pynmih ko ya 12 tylli ki phang wa da phah cha ka sorkar jylla katwa ka KHADC won da kam ko wa dadep jubab ko ya waroh kini wa da phah ko cha ka sorkar jylla tangwa ka sorkar ym pu em ong ko iyi iyi leh heiyatoh wa ini.
Hei yatoh wa ini u Dr. Mukul da ong u wa manda yoh u yaklam daw che lut waroh i jait wei kammon u lai cha khmat.
Discussion about this post