Ka yung dorbar ka sorkar jylla ynne ka sngi kam chibynta ka Autumn Session, hadien wa kut ka sngi nyngkong da wai ya i dur sahkynmoo namo ka Portrait yong u Lamphang warim ka jylla u (L) Dr. Donkupar Roy iwa da wah chwa hapoh ka yung Assembly wa chipor wa em katni ha Rilbong, Shillong.
Ha chwa wow wai ya ini i dur sahkynmoo yong u Dr. Roy, neiliang u Montri Rangbah ka jylla u Conrad Sangma da ong u wa hawa chong pyrkhat kammon wow pynriam yaka yung dorbar wa thymme kawa dang chna katni, da rai wa kamwa leh hapoh Parliament deiwa booh sar yei dur ki Speaker waroh, kamtæ daw leh ya i jooh hapoh ka jylla.
Da ong u leh wa da pyrkhat wow booh leh i bynta wow khana yei parom ka jylla heiwa manda wan kiwa dang khynroo yow yoh mynsien ki manda psiah ki hapoh ka yung dorbar wei yow tip leh ya iwa rim kamjooh ki bru wa khroo ka jylla.
Neiliang uwa yahkhmat ka liang pyrchah u Dr. Mukul Sangma da kynmoo u ya u Dr. Roy nadooh i por wa lai thooh kreh u naka sorkar kam u Doctor hadooh ka sien wa nyngkong wa man u kam u MLA heiwa ha waroh kini da yachem wei da yoo u yeiwa man u Dr. Roy kam u bru wa khroo wa chemphang.
Kam wow pynkynmoo wa u Dr. Donkupar Roy da khlaad u haka 28-07-20 ha thaw sumaar wa em ha Gurgaon wei ha itai i por man u leh kam u Speaker ka yung dorbar chna aiñ ka jylla Meghalaya.
