Shangpung: Ka Khliehmushut Sports & Cultural Club, Shangpung kam chibynta wow thooh laad ya ki khynnah khynroo yong ka chnong wow yohlaad ki wow pynyoo yei sap yalehke yong ki katkam wa yah ka juk wa katni, da yoh u wai emburom ya ka Badminton Court wa da chna hapoh ka Khliehmushut Auditorium ha ka 22 tarik uni u bnai.
Kani man ko ka Badminton Court wa le hapoh ka chnong Shangpung, ka wa nyngkong da em ha Shangpung Pohshnong, wa ar ha Shangpung Moolibang wei ya kani kawa thymme da wan wai ya ka da u K.M. Lytan, MDC ka thaaiñ hei emlang u Kennedy Shylla, uwa man heijooh i por kam u Jt. Secretary ka WJDSA.
U kongsan da ong u wa sñiawphylla u hadooh kattæ kattæ wym poi pyrkhat wa i e yong oo iwa khian iwa da pynemkaam hok ka Khliehmushut Sports & Cultural Club iwa pynyoo wa em i krehlang hapoh ka chnong ka thaw wa da ye u man hadooh katni.
U Kennedy Shylla, da ong u wa ki khynnah toh u chimkhia bha ki ya kani ka yalehke neibhah su kani donhi ka jait yalehke ka wym pu em u bna bha ha poh ka jylla yong i, kamtæ da kyrpaad u wym toh u kheiñstin ya kani ka kaam wei ye leh u lai pynyasoh (Affiliate) waka West Jaiñtia Hills Badminton Association yow yoh yarap chooh chooh chaphang ka Badminton wa i kordor yong ka.
Da wan sakhi leh ya kani ka sngi chirup wa u Acting Daloi ka Elaka Shangpung u Chanki Langbang, u M.S. Wann u Secretary Synjuk ki Dorbar Shnong Shangpung, u waheh chnong Khliehmushut u N. Papang, u waheh chnong Moosyiem u L. Suchiang, ki Doctor, ki sahep sorkar, ki manbei manpa wa ki khynroo khyllood ka chnong ka thaw.
Ini toh katkam wa pyntip u Seibormi Suchiang, Jt. Secretary Khliehmushut Sports & Cultural Club, Shangpung.
Discussion about this post