Ynne ka sngi u MLA ka Jowai, u Wailadmiki Shylla da wai u ya ka Iawmusiang Urban Health and Wellness Center ha ka yalang wa tbian wa pynlai da u Dr. K. Dkhar uwa man u Additional DMHO ka West Jaiñtia Hills District.
Kani ka thaw sumaar toh kawa em ha ka mala wa jooh em ka Choice Restaurant kawa man ka yung dukan wa em mar pyrchah waka Jowai Police Station.
Neiliang ka Dr. M. Syngkon, District Surveillance Officer, IDSP da ong ko wa i em kani ka thaw sumaar man ko iwa myntoi bha ya kiwa boon ym du kiwa chong wa sah ha Iawmusiang tangwa wot ya kiwa wan yaaw na ki chnong wa jngai.
Da ong ko leh wa ha kani ka thaw daw ye u e sumaar ya ki kjut wa har rukom wei kiwa wan yaaw ye ki leh wow wan thaw BP wa kiwi kiwi.
U Wailadmiki hawa e yei klam da kyntu u ya ka Dorbar Chnong Tympang Iawmusiang wow man kawa yakrehlang wa kani ka UHWC khnang wow myntoi ki paidbah wa wan thooh dawai.
Da pyntip u wa daw wai sa kawi ka thaw sumaar kam kani wei katæ toh ha Mihmyntdu.
Heijooh i por da kyntu u ya kiwa kreh ha kani ka thaw wow man ki kiwa jemnood ya kiwa wan thooh dawai neibhah deiwa jem mynsien, ki bru leh daw sñiaw ki kamwa da jem i kjut i chitom pyn nei jem mynsien kiwa kreh.
U Wailadmiki da ong chooh chooh u wa deiwa em kani ka thaw daw myntoi bha ki manbei wa ki khynnah.
Ya ka yalang da pynkut da ki ktien khublei na ka Dr. L Pyrbot kawa man ka Medical and Health Officer kani ka thaw sumaar.
Discussion about this post