U Lahkmen Rymbui, MLA ka Amlarem ha ka 20 tarik uni u bnai da wai u ya ka madan yalehke Futsal wa nyngkong dooh hapoh ka thaaiñ Amlarem Civil Sub-Division, West Jaiñtia Hills District kawa em ha chnong Amshipai marjan wa ka chnong Amlarem.
Ya kani ka madan da mantre da u Herman Khonglah wei da chna ya ka da ka SDA Impex ka Company wa da bna bha wow chna kam kini ki jait madan.
Ha ka yalang tbian wa da pynman chwa u wai ya ka madan, da emlang nadooh kiwa yahkhmat chnong ka Amshipai nadooh u waheh chnong, u Mararba Pohshna, u Francis Dhar kam u dkhot chnong, u Medlin M Swer, MDC ka War East wa kiwi wa chah khut sñiawbha, katwa u Lahkmen Rymbui da man u kam u kongsan wa u Rudion Kyndait kam u symbood kongsan.
U Lahkmen hawa e yei klam da yaroh u ya ki bru wa em i mynsien wow mih chakhmat u leh ya iyi re iyi neibynta i myntoi ka imlang sahlang hanla kani man ka thaw wow khih wow kamai leh tangwa ong u lym em won kiwa pynlut u chna ym ye u yoh laad, kamtæ u Herman Khonglah da pynlut u yow e laad ya ki khon khynroo ka thaaiñ.
“Da tip i wa i chait i khiah wa i yalehke man i iwa emkaam tam, wei i em kani ka madan Futsal ym mut du kat wow e laad ko u yalehke tangwa kammon leh u yoh yei chait i khiah deiwa myllien hei yalehke man-i-por,” da ong u Lahkmen.
Chooh chooh ong u ka yalehke Sport man ko kawi wa ka sorkar leh kyruiñ khmat ko ha kylleiñ ki thaw deiwa pynlut da ki boon phaw klur neibynta ki khon khynroo, wei ha kani ka thaaiñ Amlarem leh da em i chna ya ka madan Stadium ha Ladjaplem iwa da lai chakhmat.
Yooluti u wa daw em kiwi won leh ki madan wa daw yoh hapoh ka thaaiñ wei iwa kongsan hi toh kammon u ya kreh wei pynemkaam ki.
Kamtæ khut u ya ki khon khynroo bar wow pynlut i por hei kaam ke wym em myntoi dang lah wow pynlut ha kam kani ka madan yow yoh yei chait i khiah khamtam u lait nei pyrkhat boonjait wa ye u pyndooh myntoi.
Discussion about this post