U Montri Rangbah ka jylla, u Conrad K Sangma ynne da wai u ya ka Mallangkona Police Outpost kawa em ha West Khasi Hills deiwa emlang u Symbood Montri Rangbah, u Prestone Tynsong, u R. Momin, MLA, ka DGP ka Meghalaya, ka Idashisha Nongrang, u Gigur Myrthong, MDC wa kiwi de ki heh sorkar ka chnat pulit.
U Conrad da ong u wa i chngaaiñ kiwa chong chnong ka jylla toh iwa emkaam dooh ya ka sorkar wei ki paaid ka Mallangkona da dawa ki wow em ya ka Police Outpost da slem bha wei deiwa em kani ha ki thaw khappood waka Assam toh iwa emkaam bha wei ka sorkar da yaleh ko leh wow pynbait noh sa ya ki 6 tylli ki thaw wa ya kajia pood waka Assam.
Da pyntip u wa ya kani ka Mallangkona Police Outpost da chna lyngba ka PIRF Fund kawa katni da booh ha waroh ki Superintendent of Police yow ye ki wow pynemkaam yow pynchna yeiwa da sih da jæd.
Da yaroh u leh ya kiwa chong chnong kiwa da wan chakhmat yow kreh hadooh wow pynbiang ya ki tiar ki tar wa emkaam deiwa pynrap wa kani man ko ka nongmuna ya kiwi wow bood ki.
Kani ka Mallangkona Police Outpost toh kawa da booh nyngkong ha u snem 2019 wei deiwa pynlut Rs 17.5 lak da ye wow chna ya kani ka yung wa thymme hapoh ka Police Infrastructure Renovation Fund (PIRF) Scheme ha chnong Mallangkona kawa em hapoh ka Mawsynrut Civil Sub-Division.
Discussion about this post