U Montri Ragbah ka jylla, u Conrad Sangma ynne da wai u ya ka P.A. Sangma Football Stadium kawa daw man leh kam chibynta ka P.A. Sangma Sports Complex wa em ha Tura kawa man ka madan wa da angnood da slem u pynchna.
Kani ka madan toh kawa da jooh pynman ya ka Tura Football League waka Subroto Cup nadooh wa wai ya ka ha u snem 2006. Kani ka Stadium toh kawa heh dooh hapoh ka ri kawa man kam ka Pre-Engineered Composite Football Stadium kawa chniam hadooh 9500 ngut kiwa wan paitke.
Da chna ya kani ka Sports Complex hei lut wa T. 127.7 klur kawa da jan dep u pynchna. Manda dep u pynchna waroh najrong ka Football Stadium, daw em leh ar tylli ki Indoor Stadium kiwa da chna hei thaw wa heh 17,000 sqms. Ka Indoor Stadium daw em ko ya ka Gymnasium, Swimming Pool, Table Tennis Hall, Squash Hall wa Badminton Hall wei daw wai ha u Kmaichonglad (Dec) 2023.
Ka sorkar da pynbna ko leh wa da sdang wow thooh ya kiwa em yei sap nadooh kiwa dang khian rta wei ha ka bhah wa nyngkong da sylli yei sap ki 4,600 ngut ki khynnah wa em hei rta wa 10 hadooh 18 snem katkam ka kyndon International Standard yow bichaar yei sap yong ki. Wei katkam wa chem da em kiwa ye u pyntam ya kini ki International Standards kitæ u Raksan Sangma (17 snem) uwa na South West Garo Hills uwa da phet 2.84 Second ya ka 20-Meter Sprint heiwa i por wa da booh katkam ka International Standard toh 2.99 Second.
Da pynbna leh wa da sdang ya ka Cash Award Scheme for Sports Achievers heiwa da em ka poisa wa T. 3.14 klur yow myntoi ki 3000 ngut kiwa yalehke (Athletes).
Ha kani ka sngi wai da pynman leh yaka yalehbol hapyrdi ka Meghalaya State Team waka North East United Football Club. Da em leh ki tem ki put na kiwa boon wei da pynkut deiwa thang bomkala wa boonjait deilang wa i pynwyrngia da ki Drone.
Da emlang leh ha kani ka sngi wa u James Sangma, Montri ka chnat i chait i khiah.
