U Montri Rangbah ka Meghalaya, u Conrad K Sangma ha ka 13 tarik uni u bnai da wai u ya ka Prime Music Incubation ha District Auditorium, Tura.
Hawa e yei klam da ong u wa kani ka Music Incubation u man ko kam ka chlem wow yahluti ya kitu kiwa em ka thong wow pynman yei tem i put kam ka laad im ja, “Man ko i kaamram yong i wow pynyoo kammon wow pynemkaam yei chit mynsien ki khynroo ha ki kaam wa bha wei kani ka Music Incubation toh ka wow pynkupbor ya kiwa tem wa put yow poi ki cha ki kyrdan wa ye i sap yong ki wow yah ki.”
Da ong u leh wa ka sorkar lynbga kiwa boon ki kaam wa da sdang ko, da yaleh ko wow pynchlur ya kitu kiwa em yei sap ha ki kaam Sports wa i tem i put hapoh ka jylla.
“75% kiwa chong chnong ka Meghalaya toh kiwa dang khynroo wei kam ka sorkar toh i kaam yong ka wow pynchlur ya ki khynroo yow ngiat ki cha ka luti wa biang wei wow em leh katæ thaw ya ki wow pynliah wei kamjooh wow yahluti kammon u ku ki”, da ong u Conrad.
Chooh chooh da ong u leh kam ka sorkar toh kawa da rai kut wow e rynsan ya ki khynroo khyllood yow chim kabu yei bor yong ki neibhah em kamwa 70,000 ngut man-u-snem ki khynroo kiwa wan yow thooh kreh hapoh ka jylla wei ye u ku chooh chooh kat dang lai ki snem.
“Em du 6 lak ngut ki bru hapoh ka jylla kiwa 45 snem chaneiñ katwa kiwi toh kiwa dang khynroo, kamtæ da sdang ya kiwa boon ki kaam ki wow pynku wei wow kyntu kynrong ya ki khynroo”.
U Conrad da kynmoo u leh wa heipor wa dang khynroo heiwa oo leh toh uwa ka-it bha yei tem i put tangwa ka sorkar ym em kyrchaan ko ya kiwa tem wa rwai ha kitu ki por, “Ynne deiwa sdang ya kani ka Music Incubation daw ye ki khynroo yong i wow yoh yei sikai yow sai lut yei sap wa em ki”.
“Em chiboon ki laad ha ki kaam wa yatoh wa i tem i put wei ka thong toh yow pynman ya kani kam ka karkhana kawa heh”, da ong u Conrad.
Da khana u leh wa ha ki 3 snem wa da lai, ka sorkar da ye ko wow kyrchaan ya palat 3000 ngut hapoh ka Meghalaya Grassroots Music.
Discussion about this post