Ka sngi wow sahkynmoo ya ka jylla Meghalaya khamtam ya ka Ri-loom Garo ynnin ka 14 tarik heiwa u Montri Rangbah ka jylla, u Conrad K Sangma da wan wai u ya ka nyngkong dooh ka skurbah ka jylla namo ka State University kawa da tip noh kam ka Captain Williamson Sangma State University (CWSSU) wei da wai u leh ya ka yung krehkaam wa thymme wa pura yong ka kawa em ha ka chnong Balalgre, South West Garo Hills District.
U Conrad da e u ya kani ka State University wa nyngkong ka Meghalaya kawa da e hei pyrtuid u Montri Rangbah wa nyngkong ka jylla, u Captain Williamson Sangma deiwa ong wa kani man ko leh kam chibynta i dap 50 snem ka jylla.
Da ong u wa kani ka State University nachwa da tip kam ka Captain Williamson Sangma State Technical University kawa duna ki lain puræ wei na kiwa boon ki daw nachwa ym ye wow pynyoh da ka State University, tangwa ka Cabinet da rai ko wa kani ka Technical University u pynkylla noh ka cha ka State University wa pura wei ka sorkar da pynmih ko ya i pynbna kawa daw yoh ya ka muhor u Lat ka jylla.
Hawa jubab yeiwa ong u VC kani ka University, u R.D. Shira wa dang em boon i duna ha kani ka yung krehkaam ka University, u Montri Rangbah da ong u wa dang hap wow kreh chitom chooh chooh yow pyndap pynbiang ya waroh iwa emkaam kiwa lai puræ wa kamjooh leh kiwi kiwi de.
Deiwa em ya ka University wa pura yong ka jylla daw pynlait ko leh ya ki khynnah wow yaleh ya ka Common University Entrance Test (CUET) wei ki College ye ki wow jied wow yoh noh yei tipmit naka State University heithaw wow lai paan yei tipmit naka NEHU.
Ha kani ka sngi da emlang leh u Chief Adviser u Montri Rangbah, u Thomas A. Sangma, u Commissioner & Secretary, Education, u B.D.R.Tiwari, u Secretary Education, u Ambrose Ch. Marak, u Vice-Chancellor CWSSU, u R.D. Shira, u Tura Municipal Board Chairman, u J.D.Sangma, u Chairman KVIB, u Subir Marak wa kiwi kiwi de.
