Nachwa ka thaw wa man kawa jakhlia, ka thaw lai paikhana, ka thaw noh jhep ki paidbah wei ka thaw wa leh ya kiwa boon ki kaam wa sih, ynne won hadien 36 snem, ka nongbah Shillong da yoh ko wow pynyoo yei khmat wa kmen wa i mynsien wa sñiaw sarong wa ha ki sanphaw tylli ki snem hadien wa da yoh ya ka jylla wa pura da ye noh wow wai ya ka 5 Star Hotel wa nyngkong dooh ha kani ka jylla kawa u tip kam ka Vivanta Meghalaya, Shillong kawa em ha Khyndai Lad.
Kam i dak wow wai noh ya kani ka Hotel, da em ka yalang ynne ka sngi heiwa da e kti ya u chabi kani ka Hotel da u Montri Rangbah ka jylla, u Conrad K Sangma cha ki dkhot yong ka Indian Hotels Company Ltd ka wow pynlai ya kani ka Hotel.
Kiwa da wan wow sakhi yeini i wai kynthup i nadooh u Montri wa pait ya ka chnat Tourism, u Sniawbhalang Dhar, u Chairman ka MTDC, u Saleng A Sangma, u Chief Secretary ka jylla, u D.P. Wahlang neitæ ki Chief Secretary warim wa kiwa da chong-ngiah ka jylla deilang wa kiwa boon kiwa chah khut sñiawbha.
Kani ka Hotel toh kawa da sdang kreh nadooh u snem 1986 wei da e pyrtuid kam ka Crowborough Hotel tangwa da mih chiboon i thut wei da chimkti da kiwa boon wow chna pyndep ya kani ka thaw.
Kani ka Hotel toh kawa da chna hei thaw wa heh kamwa 8,800 sq.m wei da em ko waroh 101 tylli ki kaam ya kawa da emlang leh kam ka Specialty Restaurant, Coffee Shop, Bar, Retail Shop wa ka Banquet Hall heiwa ka tre yong ki toh ka Meghalaya Tourism Development Corporation Ltd wei da e wai noh kamwa 33 tylli ki snem ha i rukom krehkaam wa tip kam ka PPP ya kawa daw chimkti wei wow pynlai ya ka da ka Indian Hotels Company Ltd.
Hawa klam kam u kongsan, u Conrad da pynsñiaw u yei kmen wa khroo wa hawa kut ynne ka sngi da ye wow pynmankaam yei thrang wei angnood yong ki paidbah wei ka sngi ym kut du hei wai paidbah wei da kyrmen u wa ka mynried kawa tyrchaaiñ ya ka jylla deiwa pynyoh kreh deiwa wan kiwa uiñke suwari kiwa na ki ri ka pyrthai.
Da ong u leh wa nadooh wa sdang, ka sorkar hapoh i yahkhmat yong oo da chimkhia ko wow leh ya kiwon kiwon ki kaam kiwa waroh chi kattu da sahdien, wei ha kini ki soo snem chiteiñ kani ka sorkar yong oo da ye ko wow pyndep leh ya ki.
Da klam u leh yei thong yong oo wow pynkylla ya ka Meghalaya kam kawi na ki Top 10 States ha ki 10 snem wow wan wei ka kaam uiñke suwari em ko hapyrdi dooh yong ini. Da khana u leh wa daw pynkylla noh kam ki thaw uiñke suwari ki wow em hapyrdi wa kynthup ya ka Sohra, Jowai, Shillong, Umiam wa Tura wei yow leh yeini da wanrah leh ya ki kaam yow ye u chna thaw sah kiwa heh kiwa man kam ki Resort ha Sakaladuma, West Garo Hills, ha Shnongpdeng, West Jaiñtia Hills, ha Sohra, East Khasi Hills, ha Mawlyndep wa Nongmahir, Ri-Bhoi, ha Nongkhnum, West Khasi Hills, ha Thadlaskein, West Jaiñtia Hills wa ha Pelgawari, South West Garo Hills wei daw pynlut T. 5 klur hadooh T. 10 klur wow chna ya kiwi wa emkaam ha kiwa boon tylli ki chnong.
Da khana u leh chaphang ka ‘Homestay Scheme’ heiwa daw chna ya 2,500 tylli ki thaw sah ha kini ki 5 snem wow wan deiwa krehlang waka PMEGP. Daw em ka Subsidy kawa 35% ha ka ram kawa T. 10 lak wa daw e da ka sorkar jylla wa 35% ka Subsidy wa daw e da ka sokrkar India hapoh ka PMEGP. Wei da ini, kiwa chong chnong daw ye ki wow yoh hadooh T. 50,000 chi bnai deiwa su ya ka EMI kawa T. 5,000 donhi chi bnai. Wei da em 480 ngut kiwa da yaleh wow yoh ya kani heiwa ka sorkar da booh poisa ko T. 7.1 klur yow chna ya 75 tylli ki Homestay.
Kiwi kiwi kiwa da e yei klam ha kani ka sngi kynthup ki ya u Sniawbhalang Dhar, u D.P. Wahlang, u Saleng A Sangma, ka Deepika Rao, Executive Vice President ka Indian Hotels Company Ltd wa ki kyntien pdiang sñiawbha da e da u Dr. Vijay Kumar D (IAS), Commissioner & Secretary Tourism ka sorkar wa i kyntien e khublei da yoh na u Vikas Agarwal MD&CEO, SM.
