U Montri Rangbah ka jylla, u Conrad K. Sangma ynne da wai u ya ka yung krehkaam wa thymme ka Tura PHE Sub-Division, heiwa kani ka Sub-Division toh kawa rim dooh ha Ri-loom Garo.
Ya kani ka yung da mang poisa wow chna ha u snem 2019 hapoh ka State Plan ha i lut wa T. 1.57 klur.
U Conrad da sñiawkmen u wow ye u wai ya kani ka yung krehkaam wei ngait skem u wa daw ye ko u e chakri wa pura cha ki paidbah.
Da ong u wa ha ki 4 snem chiteiñ dei chimkhia ka sorkar, ka chnat PHE da kylla bha i rukom krehkaam ko wei man ko ka chnat kawa rap bha i kreh bar ya kiwi tawon.
Chooh chooh da yaroh u ya ka chnat wa da ye ko wow pynkrehkaam ya ka Jal Jeevan Mission heiwa da pyntip u wa ka Meghalaya toh kawi na ki jylla kawa pynkrehkaam ya kani ka Mission heiwa ka jylla leh da yoh ko ya ka Award hajrong ini.
Heijooh i por da ong u wa ha u 2018 em du 4,000 tylli ki manyung wa yoh umkor wei ka jylla man ko kawa duna bha ha ka ri heiyatoh wa ki yung wa yoh umkor tangwa du hapoh 4 snem chiteiñ da em hadooh 2.5 lak tylli ki manyung ha ki thaw palatsor kiwa da yoh umkor.
Da pyntip u leh wa nei kreh bha ya kani ka Mission da yoh leh rap boon ka poisa hei wow pynkreh chooh chooh ya ka.
U Conrad da ong u leh wa khnang wow pyndap yeiwa emkaam ki sor wa ki sarok-khian kiwa emkaam rap boon, neiliang ka sorkar da pynkreh ko ya kiwa boon ki Scheme wei kini katni dang man ki kiwa lai chaphrang.
Neiliang u Montri Rangbah da khana u leh wa hapoh ka AMRUT Scheme da chimkti ya ka Williamnagar Water Supply Scheme wei hapoh ka NESIDS yong ka chnat DoNER ka sorkar pyrdi da ye ko u pynkreh ya ki Scheme saam um ha Sohra wa Tura.
