Ka yung krehkaam wa thymme ka One Stop Centre ha Khliehriat da wan wai ya ka da u montri ka chnat Social Welfare ka jylla u Kyrmen Shylla hei emlang u E. Kharmalki, Deputy Commissioner, East Jaiñtia Hills District, u D.D. Shira, Director of Social Welfare Department, Shillong hei emlang u M.S. Sangma, Additional Deputy Commissioner wa u I. Talang, Deputy Director, Social Welfare Department, Shillong.
Ka One Stop Centre ha ka District daw yarap ko ya ki kynthai wa chah ktah ha ki kaam damok kaam pynmynsoo la ha yung næ ha lait, wa ha ki thaw kreh wei kamjooh leh ki kynthai wa chah thombor khlem ñiaw chiliang ya ki.
I chakri wa e lyngba kini ki Centre toh kiwa boon nadooh i emkaam yarap wa jhan (Emergency Response and Rescue Services), i yarap sumaar (Medical Assistance), wow yarap u ujor FIR/NCR/DIR, wow pynbiang thaw sah (Shelter), ki kaam aiñ (Legal Aid) wa i sneiñ i yahluti (Counselling).
U Kyrmen hawa e yei klam da ong u wa kani ka Centre daw yarap ko ya ki kynthai wa chah thombor deiwa kdaw wa ha ki por wa dadep da ku bha ki kaam wa man pyrchah ya ki kynthai wa ki khynnah wei dei em kani ka yung krehkaam daw yarap bha ko ya ki.
U E. Kharmalki da yaroh u ya ka chnat District Social Welfare Officer wa da chna ya kani ka Center ha ka District deiwa pynrap wa i chakri ka Centre daw yarap bha ko ya i bha i miat ki kynthai.
Kiwi kiwa da klam ha kani ka sngi toh u D.D. Shira, ka R. Passah, District Social Welfare Officer kawa e ya ki kyntien pdiang burom, ka D. Lyngdoh, Para Legal Personnel/Lawyer ka Centre wa u T. Phawa, IT Staff wa kiwi kiwi.