Ka yung skur wa dang chna thymme yong ka Amlari Model Government Lower Primary School wa em ha Alarem Sub-Division, West Jaintia Hills, da wai paidbah ka ynne ka sngi da u Lahkmen Rymbui, Montri ka chnat Puræ Puthi wei kani ka skur toh kawa da seiñ ha u snem 1964 da i thmu wow pynku yei stat i tip kani ka thaaiñ.
U Montri hawa e yei klam da kdaw u yeiwa emkaam yei pynbha pynmiat ya ki thaw puræ deiwa ong leh wa emkaam u em i kitkhlieh kiwa sikai wa kiwa pynlai ya ki skur kamjooh wow pynneh pynsah yeiwa dadep chna ka sorkar.
Da pynkynmoo u leh yeiwa yoh yarap lyngba ka Samagra Shiksha Abhiyan kawa e ya ki kot skur deiwa mynkna, ki Uniform wa i ja sngi (Mid-Day Meal) cha ki khynnah skur sorkar wa ki skur kiwa yoh yarap na ka sorkar.
Da pynche u leh chaphang ka Chief Minister’s Scholarship Scheme (CMSS) 2025, kawa e Rs.6,000 chi snem cha kiwa lai puræ ka Meghalaya nadooh Class XI hadooh kyrdan PhD, kawa da pynmyntoi ya hadooh 80,000 ngut.
Najrong kini waroh da klam u leh yei kreh ka sorkar jylla yow pynbha ya u sarok Tawah-U-Sdiah, Amlanai wa Amsohrahong. Wei da ong u leh wa i wai ya ka Captain Williamson Sangma State University i wai ya ki skur wa ki College wa thymme ha Patharkhmah wa Mawphlang deilang ka Shillong Medical wei iwa dang chna ya ka Medical College ha Tura man ko ki kaam wa leh ka sorkar neibynta i myntoi ki paidbah.
Ya ka yalang da pynlai da u H. Pohphlet, waheh chnong ka Amlari Model deiwa emlang ka Mebapynshai Khonglah, Head Teacher, u Dr. D. Lyngdoh, BDO Amlarem, u D. Lakashiang, Dolloi ka Elaka Satpator, ka D.P. Lytan, SDSEO Amlarem wa u M. Swer, MDC yong ka War East uwa man leh u EM ka JHADC.
Discussion about this post