Ynne da man ko ka sngi wow sahkynmoo neibynta ka jylla Meghalaya, khamtam yaka jaitbru Ynñiaw Trep heiwa ka sorkar Meghalaya da ye ko wow booh ya u motdur yong u Khlawait ka Ri Khasi, u Syiem Tirot Sing ha Indira Gandhi Cultural Centre (IGCCR) wa em ha Dhaka, Bangladesh.
Ya uni u motdur wa da booh ha IGCCR ha Dhaka toh deiwa ya krehlang ka Ministry of External Affairs (MEA) ka sorkar India waka sorkar Bangladesh.
Ya uni u mot da wan wow wai da u Symbood Montri Rangbah ka jylla Meghalaya, u Sngiawbhalang Dhar wa u Indian High Commissioner ka India cha Bangladesh, u Pranay Verma wei da emlang leh u Montri ka chnat Arts and Culture, u Paul Lyngdoh, ka Health Minister, ka Ampareen Lyngdoh, u Chairman ka Meghalaya State Planning Board, u Metbah Lyngdoh, u Chairperson ka UPSC uwa man leh kam uwa thooh bniah, u Prof. David R Syiemlieh wa kiwi won kiwa da chah khut sñiawbha.
Ha kani ka sngi da pynlait leh yei parom u Syiem Tirot Sing wei da pynkylla pyrtuid leh yaka Indian Council Cultural Research Library ha Dhaka cha ka U Tirot Sing Library.
Ha kani ini i wai ya u mot sah naam yong u Tirot Sing uwa da yap hapoh patok ha Dhaka da wan wow sakhi leh da u Syiem ka Hima Nongkhlaw uwa man leh uwa hiar pateiñ, u Pa’iem Phrester Manick Syiemlieh, u Syiem ka Hima Bhowal, u Kynsaiborlang Syiem wa kiwi.
Ya uni u motdur da chna wei pynwandur da u Raphel Warjri deilang wa ki bru u, wei neiliang ka chnat Arts & Culture da kyrchaan poisa ko Rs. 11 lak yow chna ya uni u motdur.
Discussion about this post