U Montri Rangbah ka Meghalaya, u Conrad K. Sangma ynne da wai u yaka Dalu Civil Sub-Division deiwa emlang u Brening A Sangma, MLA ka Dalu yow pynmankaam yeiwa da angnood ki paidbah kani ka thaaiñ da slem bha. Kani da man ko leh ka Sub-Division kawa le hapoh West Garo Hills District.
“Kani ka sngi toh ka wow sah kynmoo ya ki paidbah ka Dalu wot ha ki snem ki pateiñ wow wan wa da pynmankaam yei angnood ki paidbah kani ka thaaiñ,” da ong u Conrad, deiwa kynmoo ya u pa u u tynde u Purno Agitok Sangma, uwa da sdang yei lai skur u ha ka skur ki Missionary ha Dalu.
U Montri Rangbah da khana u wa u Purno Sangma toh uwa yajan bha wa ki bru ka Dalu wei da pynsñiaw bait u yei kwah u wow pynku yei rukom im ki bru.
“U Purno Sangma da kwah u wow wanrah chiboon ki kaam pynroi tangwa na ki daw wa boon ym ye wow pyndep ya ki wei kawi na kini toh wow wanrah yaka Civil Sub-Division ha Dalu. Nga da kmen O hadooh kattæ kattæ wa da ye u wai ya kani ka Civil Sub-Division ha Dalu kawa da kwah da angnood ki bru da slem,” da ong u Montri Rangbah.
Da ong u leh wa kani ka sorkar toh kawa kreh yow wanrah yei roi i paar cha waroh ki bru wei da leh chiboon ha ki kaam puræ puthi, i chait i khiah, ki yaleh Sports wei kini da em ki dak ki chin wa pynyoo wa da sdang u kylla i rukom im ki bru.
Chooh chooh da ong u wa yow pynjan ya ka sorkar cha ki paidbah, da sdang ya ki Block wa thymme wa ki Civil Sub-Division yow pynpoi smat yei chakri sorkar cha ki paidbah.
