Ka chong Mupyut, West Jaiñtia Hills District kawi naka chnong wa da yoh umbaam umdih naka chnat PHE, da dap ko dei kmen ynne ka sngi wada ye u wai paidbah yaka Scheme saam umkor kawa rap heh ha kani ka chnong kawa tip kam ka Mupyut Water Supply Scheme kawa da chna hapoh ka Scheme JJM ka sorkar pyrdi kawa da booh mooyurim wow chna haka 10-12-21 wei da ye wow wai ka hapoh chi snem.
Hapoh kani ka Scheme saam um u yoh myntoi hadooh kamwa 417 tylli yung heiwa ka umkor warim toh kawa khian ka wym ye u pyndap yaki paidbah kawa da Gravity System wei katni da pynemkaam da ki Pump.
Ya kani ka Water Supply Scheme wa da wai ynne da ye u kreh pyndep hei lut wa T. 7,46,19,600 heiwa da wan wow wai yaka da u Lahkmen Rymbui, MLA ka thaaiñ uwa man leh u Montri sorkar jylla, hei emlang ka R. Kynjing, Executive Engineer PHE, u Lamdibok Sumer, MDC warim ka War East wa kiwi ki waheh wasian haka yalang wa pynlai da u Waheh Chnong Mupyut.
Ka R. Kynjing ong ko wa hei yong sakhiat ka Mupyut ym toh de u yoh Scheme thymme ko neibhah wada em chwa ka warim, tangwa dei booddien u MLA neidaw wym dap um ka chnong wot lada pyrchang pynheh leh da ka warim, kamtæ da yoh noh daka Scheme thymme wa heh wa pynkemkaam da ki kor Pump.
I daw wa heh i lut lyngba kani ka Scheme thymme ong ko toh wa hap leh daka Pumping Scheme wei da pynemkaam hadooh le tylli ki thaw taan um yow dap um ka chnong, neitæ da hap riñ bordiñ, hap pyndait Pump, da chna leh kawi ka top pynlang um wa heh, 6 tylli won ki top khian wa 34 tylli ki Service Tank yow pynpoi um cha ki thlu yung.
U Lahkmen Rymbui won hawa e yei klam sñiawkmen u wa ki mooyurim wada booh ynnin snem ha kani ka chnong nadooh ka umbaam, i chna ya ki L.P. skur kiwa kynthup yaka Madantrypait Govt. LP School waka Mupyut Govt. LP School kiwa mar T. 37 lak kawi da ye u kreh pyndep.
Da ong u wa kamwa angnood u pynku bha yaka chnong Mupyut kawa maad yei eh hadien wa khang Mooyong, iwa hakhmat dooh kwah u toh u pynku yeitip i stat, neitæ i daw wa yaka U.P. skur ha Shkenpyrsit kawa em marjan da pynman yaka kam ka Secondary School.
“Kamwa ong ka ktien toh u burom kylliang, kamtæ kamwa da dep kyrchaan pura phi ya nga haka Election wa dep, i su kylliang yong nga won toh da ki kaam pynroi, wei kiyi wada kular da pyndep O hanla em ki surok wa kiwi ki kreh wa daw sdang,” ong u Lahkmen.
“Burom phi ya nga u man O kam uwa mihkhmat yong phi katwa nga won u burom o ya phi da ki kaam neibynta i myntoi yong waroh lang”.
Heijooh i por kyntu haroh u wow maya u syndong yei myntoi wa yoh naka sorkar khnang wa i myntoi u neh ko pateiñ la pateiñ.
Ha kani ka sngi u Lahkmen da saam u leh yaki Work Order cha ka Good Shepherd English School Mupyut T. 8 lak, chaka Madantyrpait R.C. School T. 4 lak wa cha ka Mupyut U.P. School T. 7 lak.
Puræ leh: Chisien don booh mooyurim u Lahkmen ya le tylli ki skur waka Mupyut Water Supply Scheme
