Ynne ka sngi man ko ka sngi wow sahkynmoo ya ki paidbah ka thaaiñ Namdong heiwa u Montri Rangbah ka jylla, u Conrad Sangma chirup wa u Montri ka chnat Tourism, u Sniawbhalang Dhar deilang wa u MLA ka Jowai u Wailadmiki Shylla da booh mooyurim ki yong ki kaam pynroi ha ka thaaiñ.
Kini ki kaam kynthup ki ya ka Namdong C&RD Block, wow pynku kyrdan ya ka Namdong PHC cha ka CHC, ka Greater Mukhnang Lumrot Water Supply Scheme kawa T. 46 klur wa i chna pynmiat ya u sarok Jowai-Nartiang-Kdiap-Khanduli (JNKK) Road uwa jrong 59.995 Km ha i lut wa T. 40 klur wei i kreh u sdang i ha uni u Kmaichonglad (Dec).
U Wailadmiki Shylla da e khublei u ya u Conrad Sangma wa da pynyoh ya kani ka C&RD Block wei da man u u Montri Rangbah uwa da lai cha waroh ki kdong ki chmiang ka jylla wow rah ya ki kaam pynroi. Da yaroh u leh ya u Sniawbhalang Dhar uwa da kreh chitom wow wanrah ya kani ka Block cheini neibhah dei em kani ka yung krehkaam daw pynsuk ko chiboon wow yoh ki laad yarap wa e ka sorkar.
Da ong u wa boon ki bru wa beiñ ya ka sorkar tangwa emkaam leh wow yaroh hawa kreh ya ki kaam.
Neiliang u Sniawbhalang Dhar uwa man leh u MLA ka thaaiñ da ong u wa da slem wa mut u pynku kyrdan ya ka PHC tangwa nei wan ka khlam COVID-19 tæ da pynsangeh noh ya ini
Da ong u wa ki bru da ong ki kani toh ka Block Election tangwa da pynche u wa kani toh ka yung krehkaam wow neh chi rta.
Kani ka Block u kynthup ko ya ki 40 tylli ki chnong.
Da ong u wa ka Nartiang Constituency man ko kawa nyngkong neibhah ki bru da man ki kiwa sñiawthooh yeini wei ymtoh kiwa ngait ya kiwa chah pynbiej.
Hajrong i chah pynbaad, da ong u wa ka sorkar kawa kreh em bait ki wow pyrchah ymtoh kam ka sorkar ka wym kreh.
Da ong u wa boon klam ki wa ka TMC khlan ko ha Ri-loom Garo tangwa ki paidbah toh u tip wa ka TMC toh kam ka Congress hi wei ki paidbah man ki katni kiwa yoo jngai.
Chooh chooh da ong u wa ka Nartiang Constituency man ko kawa nyngkong dooh wow yoh um dih ha waroh ki chnong.
Neiliang u Conrad Sangma hawa e yei klam da ong u wa dap u dei sñiawkmen wow yoh u wai ya ka Namdong C&RD Block wa kiwi kiwi dei kyrkhu u Blai.
Da e khublei u ya u Sniawbhalang Dhar wa da kreh chitom u wow wanrah ya ki kaam pynroi hapoh ka Constituency liang wanang.
Chooh chooh da ong u wa ka sorkar MDA da wanrah ko chiboon i kylla wot hapyrdi wa em ka khlam COVID-19.
Da khana u wa ka sorkar jylla jooh em ko hei wa 27 na ki jylla tangwa katni dei kreh chitom ka sorkar wa katni du hapoh 3-4 snem da ku ko cheiwa 2 na ki jylla.
Da ong u wa ka jylla da yakhun ko ym du ha ka ri tangwa wot cha baar ri heiwa ka jylla da jop ko ha ka yakob wa pynman da ka United Nations heiyatoh wa ka eGovernance.
U Conrad da ong u leh wa ka sorkar da pynman ko ya ka North East Olympic Games heiwa da man ko kawa jop neibhah waroh kiwa chimbynta da yaroh ki yei pynkhreh ya kani ka lympung.
Chooh chooh da ong u wa i wai ya ki Block wa ki Sub-Division toh wow wanrah ya i chakri chajan yong ki paidbah.
Ha ka yalang ynne da saam leh ya ki khon sniang wa ki syiar Kroiler cha ki warep ka thaaiñ lyngba ka Scheme PROGRESS.
Kiwi kiwa klam ha kani ka sngi toh DC ka West Jaiñtia Hills, u BS Sohliya uwa da e ya ki kyntien pdiang sñiawbha, u waheh chnong ka Namdong-B u Damian War, u Project Director ka District u PK Boro wei da pynphooh ya kani ka sngi da i rwai wa ki chaad.
