U Montri Rangbah ka jylla, u Conrad K Sangma ynne da wai u yaka thaw pynmih wei e sikai rep tit wa tip kam ka Shiitake Mushroom and Training Centre wa em ha Upper Shillong kawa kyrchaan poisa da ka Ministry of Tribal Affairs, ka Ministry of DoNER deilang waka sorkar Meghalaya.
U Conrad hawa e yei klam da ong u wa ha kini ki le snem, ka sorkar da pynlut ko kamwa Rs. 700 klur yow chna ya chiboon wa emkaam ki warep yow pynpoi yaaw ya ki mar rep ki.
Da khana u wa kani ka Shiitake Mushroom Production and Training Centre da booh thong wow yarap ko ya 1000 ngut ki warep.
Da ong u leh wa uni u jait tit wa tip kam u Shiitake uwa mih na Japan toh uwa yoh nong bha wei uwa khlan dooh ki bru wow baam hapoh pyrthai wei uwa ye u pynmih Rs. 1 lak chisien ah ya oo iwa mut ha ka 3 snem daw ye u yoh hadooh Rs. 117 klur da ki warep.
Kamtæ da pynchlur u ya ki warep wow chimkhia wow rep ya uni u tit neibhah ymtoh u chimpor neibah wa emkaam du 15 sngi neibynta kawi ka bhah wei ymtoh uwa emkaam thaw deiwa heh.
Chooh chooh da ong u wa ka yaaw neibynta uni u tit toh kawa da em chwa hapoh ka jylla wei ka jylla ye ko wow man leh kam kawa pynpoi ya uni u tit cha ka ri waroh kawi.
Yow chna ya kani ka thaw e sikai, da dep pynlut Rs. 15.15 klur deiwa booh ya ka ha Mushroom Development Centre, Upper Shillong. Wei yeini da ye u leh deiwa ya krehlang waka YATS Corporation Tokyo, kawa man kawi na ki Company wa heh dooh wa pynmih ya uni u tit Shiitake.
Ka sorkar da pynkhreh ko leh wow thied ya uni u tit na ki warep lyngba ka Shillong Shiitake Products Company Ltd (SSPL), deiwa ya krehlang waka YATS Corporation deilang waka Hill Farmer’s Shiitake Mushroom Co-Op Society Ltd (HFSMC).
Kam wow kdaw heini, da booh bhah Rs. 62.37 klur neibynta ka Mushroom Mission kawa toh u pynlut heipor wa 5 snem wei kamwa man kattæ da jan em 5000 ngut ki warep kiwa da yoh myntoi neini.
Discussion about this post