Khliehriat: U Chief Justice ka High Court Meghalaya u Justice Biswanath Somadder, ynne da wai u yaka yung bichaar u District & Sessions Judge, Khliehriat hei emlang ki Judge ka High Court Meghalaya, u Justice H.S. Thangkhiew wa u Justice W. Diengdoh, u Law Minister u James P.K. Sangma, u Social Welfare Minister, u Kyrmen Shylla haka yalang wa pynman ha pchem ka yung krehkaam warim u Deputy Commissioner, Khliehriat.
U Chief Justice, High Court ka Meghalaya, u Justice Biswanath Somadder da ong u wa da ini, da yabah yaka Judiciary namo ka kaam bichaar aiñ naka kaam synchaar paidbah yow yoh ki paidbah yei hok yong ki neibhah ka yung bichaar toh kawa wan manda em iwon iwon i kajia khamtam heiyatoh waki aiñ wada booh daka Parliament lane daka sorkar jylla.
U Chief Justice da klam u leh yei yatoh hapyrdi ka Executive, Legislature waka Judiciary kamjooh yei emkaam wow yabhah yaki yow lait kawi na ki wow pynthut yei synchaar paidbah heijooh i por emkaam ki wow ya krehlang yow lait u noh chilliang. “Ka Article 50 ka Indian Constitution da klam che ko wa emkaam wow yabhah yaka Judiciary naka Executive”, da ong u, deiwa ong chooh chooh wa ini i yabhah yaka Executive naka Judiciary daw wanrah ko yei yoh ki bru yei bichaar yow yoh ki yei hok wei daw myntoi bha ko yaka District.
U Law Minister, u James P.K. Sangma, da ong u wa ynne toh ka sngi wow sahkynmoo yaki bru ka District waka jylla wa ya kitu kiwa embynta yow pynman ya ini i kaam iwa jop. Da pyntip u leh wa ka East Jaiñtia Hills District toh ka District wa 9 hapoh ka jylla wa da yabhah yaka Judiciary naka Executive wei i thmu toh wow wanrah ya ki kaam bichaar chajan ki paidbah.
Da ong u leh wa da em boon ki mukotduma wa sahkut hapoh ka District, wei deiwa em ka yung bichaar u District & Session Judge, u Chief Judicial Magistrate waki Judicial Magistrate daw pynsmat ko wow pyndep yei bichaar.
Ha kani ka yalang, u Commissioner & Secretary, Law Department, u W. Khyllep da puræ u yaka hukum wow yabhah yaka Judiciary naka Executive hapoh ka District.
Kiwi de kiwa klam toh u Kyrmen Shylla, Social Welfare Minister, u F.M. Dopth, Deputy Commissioner, East Jaiñtia Hills District wa u R. War, Advocate, Khliehriat.
Ha kani ka yalang da pyntipmit leh yaki Judicial Officers ka District.
Kiwi de kiwa da emlang ha kani ka sngi toh ki MLA waki MDC ka District, ka G. Rani, District & Sessions Judge, East Jaiñtia Hills, kiwi ki Judicial Officers, u Deepak Kumar Palecha, Superintendent of Police, East Jaiñtia Hills District, ki District Head, kiwa waheh chnong wa Dolloi.
