Da yaklam ka sorkar jylla wa ka Assam hajrong i khang wow wanrah bordiñ ha ka thaiñ Langpih

Shillong: U Montri ka tnat bordiñ ka jylla u James K Sangma da ong u wa ka sorkar jylla da thoh ko cha ka sorkar Assam wow dam ko u pynthut ya ka scheme bordiñ ka sorkar jylla ha ka chnong Umwali kawa haap ha ka thaiñ Langpih, West Khasi Hills.

Hawa yania wa u Kimfa Sidney Marbaniang, u MLA ka Rambrai-Jyrngam, u James da ong u wa ka sorkar Meghalaya hadien wa yoh yutip na u Deputy Commissioner ka West Khasi Hills, da phah ya u Chief Secretary ka jylla wow yaklam wa u Chief secretary ka Assam khnang wow pteiñ i pynkrehkaam ya ka scheme Deen Dayal Upadhyaya Gram Jyoti Yojana cha ki chnong nongkyndong ki wym em bordiñ wa kynthup ya ka thaiñ Langpih.

Neiliang u MLA ka Rambrai hawa wanrah yeini, da ong u wa ka sorkar Meghalaya wa ka Assam da yasoi soskular ki wow burom waroh arliang hawa wanrah kawon kawon ka kaam pynroi ha u 2010 tangwa i leh ka Assam won to i wym burom ya ka soskular wei da kyntu wa ka sorkar u chimkhia ko wow wanrah ya i chongsuk ha katai ka thaiñ.