U Montri ka chnat puræ puthi ha ka jylla, u Lahkmen Rymbui da ong u wa neidaw wa pynkylla ya ki kyndon neipor cheipor da ka NCTE, da sahteiñ noh i sdang ya ka B.Ed College ha Jowai neibhah wa ka National Council for Teacher Education (NCTE) ympu chah ko wow sdang ya kani ka College hanla ka sorkar dadep thung ko ya kiwa sikai wei dadep pynbiang ko ya i thaw ha Kiang Nangbah Collge, Jowai.
Da pyntip u wa hajrong ini, ha kini ki kajiak sngi da dep u wow yaklam hajrong ini ha Delhi wow sdang noh ya kani ka College.
Chooh chooh da pyntip u wa ha u Kmaichonglad (Dec) u snem 2020, ka sorkar India da mynjur ko ya i tyrwa wow booh ya ka B.Ed ha Kiang Nangbah College, Jowai, tangwa ha u Wisu (Mar) da pynkylla biang yeini wei ka sorkar jylla da yoo ko yei emkaam ya ka B.Ed College wei man ko leh katkam i angnood ki khynroo khyllood ka jylla.
U Lahkmen da ong u leh wa i lai cha Delhi da yachem u ya u Secretary ka NCTE, uwa da pyntip wa ha iwon iwon i por daw khut biang ya ka Application neibynta ki College wa thymme khnang wa waroh u phah ki yeiwa emkaam weiwa ka sorkar da pynkhreh ko yeini.
