U Montri Rangbah ka jylla, u Conrad Sangma hawa e khublei sngi Republic Day ha Shillong ynne ka sngi da ong u wa ha u 2018 hawa chimkti ya ka sorkar da em boon i eh wa da yang nadooh i krehkaam ka aiñ, ki seiñ kieñ suloi wei da chem leh wa 50% ki manbei wa punkhon da kha khon ki ha yung khlem da em i yarap na ki bru wa pliah ha ini i kaam.
Da em leh 40% ki khynnah wym em yoh tika wei du hapoh 30,000 ngut ki bru wa em hapoh ki Self Help Group (SHG). Ki sarok PMGSK kiwa da toh u pyndep nadooh u snem 2001 leh ym em u pyndep ki. Deiwa pynrap wa ym em kdaw kti ya kiwon kiwon tangwa kini toh kitæ kiyi kiyi kiwa da yang ya ka sorkar iwa heijooh i por wa e mynsien yow kreh.
Katni da ong u wa em palat 28,000 ngut ki manbei wa punkhon hapoh ka jylla wei ka sorkar tip ko ya kawi pa kawi hadooh kawon ka Sub-Centre, PHC lane kiwon ki Doctor wa pait wa sumaar ya ki. Wei da tip thij kiwon kitæ kiwa em 10-15% kiwa rap chitom wow kha khon. Wei da ini waroh naka 50% kiwa kha khon ha ki thaw sumaar da ku cha 85%.
Da pyntip u leh wa na waroh ki 548 tylli ki sarok PMGSY da tip thij thij hadooh katwon da lai i kreh chakhmat wei lada suki i kreh da Phone bait cha u Contractor yow tip yei daw, wei katni da ye wow leh san chah ya iwa da ye wow leh 10 snem nachwa neibhah ka sorkar da pynkrehkaam ko deiwa em i kitkhlieh wei da chim yukheiñ leh yow em i khooid hawa kreh.
Heiyatoh wa ki SHG naki 30,000 ngut ki dkhot katni da em le lak chiteiñ ki kynthai wa em ha ki SHG iwa da ku da palat 1000%.
Da ong u leh wa hanla em ka khlam leh, da em 2 lak tam ki manyung kiwa da yoh umkor du heipor wa em ka khlam wei waroh da kynjoh ko 12 lak ngut.
Chwa u 2018 ym em kawi leh ka lieñsuiñ wa hær na Shillong tangwa katni da em palat 7 tylli ki leiñsuiñ wa hær na Shillong wa 7 tylli ki sor deiwa em palat 300 ngut ki bru wa wan man-ka-sngi. Wei yeini da ye u leh deiwa chim ya ka rai wow pynlut poisa yow ah ya u loom wa da pynthut yei lai i wan ki lieñsuiñ.
