U Montri wa pait ya ki Kaam Pynroi Sor (Urban) ha ka jylla, u Sniawbhalang Dhar da khana u wa katni i jhep na chnong Jowai da ye wow pynkhooid, wei ya katni ka Jowai Municipal Board (JMB) da yoh ko yei thaw noh jhep.
Da khana u wa ka sorkar ym slem de daw yoh noh ko ya ka thaw wa pura wow noh wei pynkhooid yei jhep na Jowai, wei katni da dep wow sorjamin kamwa 3-4 tylli ki thaw.
Tangwa hawa kylli ya kitæ ki thaw, u Montri da kyntait u wow khana neibhah ya mih biang i pyrchah, deiwa pynrap wa ka chnat Pynroi Sor deilang waka Municipal dang pynman ki leh ya ka pynsñiawthooh paidbah ya ki laad wow chim lada lai noh jhep dei wym ktah won ya ki soodong sookun yong ka thaw.
U Sniawbhalang da khana u leh wym em iwon iwon i pyrchah yong ki paidbah yei thmu yong ka sorkar wow chim thaw neibynta wow pynkhooid yei tngit, tangwa neiliang kiwa chong chnong kwah ki wa ka sorkar toh u pynche ko wa lada noh yei jhep wei pynkhooid yei jhep toh u leh katkam ka juk stat wa katni (Scientific) wei ym chah ktah.
Ha iwi i liang, u Montri da khana u leh wa ka sorkar ha ka tayaw wa da dep da lum ko ya ka yalang waka chnat Pynroi Sor waka Municipal neibynta wow thooh ki laad ki luti wow pynkhooid yei tngit, wei wow thooh leh yei thaw noh, wei da pyntip u leh wa kamwa man katni i thooh thaw man ko neibynta ka West Jaiñtia Hills waka East Khasi Hills, wei da khana chooh chooh wa ka sorkar daw pyrchang wow leh kamjooh ya kiwi ki District yow lait u mih i eh nei noh jhep.
