Ki bru ka State Disaster Relief Force (SDRF) deilang wa ki bru ka Fire & Emergency Service ynne i janmiet da yoh ki wow sai lut ya waroh ki metyap yong ki soo ngut kiwa da chah tlep hei khyndaw wa da oor ynni ka sngi ha chnong Nongpriang, East Khasi Hills.
Katkam i pyntip ka chnat Disaster Management, ki bru ka SDRF da chem chwa ki ya iwi i metyap ynne i step wei ynne i janmiet da chem biang sa ar tylli katwa uwi won toh uwa da chem nadooh ynnin ka sngi.
Ynnin da chem nyngkong yei metyap u Phisar Nongrum (75 snem), wei ynne i step da sai ya iwa dang sah yong u Lumlang Riahtam uwa dang 16 snem i rta.
Hei janmiet won da yoh u sai yei metyap u Kynmaw Syngai uwa 70 snem i rta wa ka Benti Riahtam kawa 60 snem i rta kiwa dang man chi yung chi sem wa uwa dang 16 snem.
Neiliang u Deputy Commissioner ka East Khasi Hills, u SC Sadhu da pyntip u wa ka poisa yarap cha kiwa ha-yung kini ki soo ngut kiwa da khlaad daw pynlait noh kawa man mar Rs. 4 lak samen.
Discussion about this post