U khynroo Mizo uwa lai puræ ha Shillong uwa tip kam u Jonathan Lalhmingthanga Pachuau uwa da chah pynbaad wa slaitbor u ya kiwa boon ki khynnah kynthai hadien wa oo hi wa kob wa leh u yeini heiwa da poor kylleiñ ha ki Social Media, da yut wei da wiar u heiwa da suba wa da lai u cha Mizoram.
U SP ka East Khasi Hills, u Vivek Syiem da pyntikna u ynnin wa da Register ya ka FIR wei ki pulit da lai thooh ki ya u Jonathan heiwa da tip wa da yut u na Shillong hadien wa bna pyrthai yeiwa chah pynbaad u deiwa suba wa da yut u cha Mizoram tangwa ki pulit na Mizoram won hawa lai thooh ya uni ym em chem ki oo wei da antaad wa ye u wow yut cha kiwi won ki thaw.
U SP da ong u wa lada liwan yung u ym dam ki wow tip wei kattæ ym em wa tip cheiwon em u tangwa da ong u wa daw yoh hi wow kem oo wei ka takit leh toh kawa dang lai bha chakhmat.
Ya ka FIR da booh ha Laitumkhrah Police Station ha ka 7 tarik uni u bnai wei i takit dang pynman deiwa pait na waroh ki liang heiwa da ya krehlang leh wa ki pulit ka Mizoram.
Kamwa man kattæ da em kawi ka kynthai kawa da wan chakhmat wei da ngait wa daw em kiwi leh kiwa daw wan chakhmat.
Katkam wa poor ka khubor, da ong wa u Jonathan da maham u wow pynmih ki Video yong kini ki kynthai lada ujor ki pyrchah ya oo heiwa da em leh kawi na kini ki kynthai kawa da punkhon.
Neiliang u President ka Young Mizo Association (YMA), u Ricky Renthlei, da ong u wa nyngkong da tip ki ya ini wa jia lyngba ki Social Media wei da kynjoh ktien ki leh ya kiwa ha-yung ha-sem u Jonathan tangwa heini i por da yut noh wei katkam wa tip ki da lai u cha Guwahati yow poi won cha Aizawl. Wei kam ka seiñ da pyntip ki cha ka chnat yong ki wa em ha Mizoram.
Da beiñ ki leh yeiwa leh u Jonathan wei da dawa pynchitom oo katkam ka aiñ lada leh sakhiat u yeiwa chah pynbaad u.
Ka YMA leh da kular ko wow yarap ya ki pulit ha iwon iwon i liang.
Ki pulit da pynchlur ki ya kiwi ki kynthai kiwa da chitom hei kti u Jonathan wow wan ki chakhmat.
Discussion about this post